Zaqatala Dövlət İdarəetmə və Texnologiya Kolleci ilə Türkiyənin Sakarya Uygulamalı Bilimlər Universiteti (SUBÜ) arasında akademik və tətbiqyönümlü əməkdaşlığın inkişafını nəzərdə tutan anlaşma memorandumu imzalanıb.
“Tehsil365” xəbər verir ki, memorandumu SUBÜ-nün rektoru professor Mehmet Sarıbıyık və Zaqatala Dövlət İdarəetmə və Texnologiya Kollecinin direktoru Dürrə Hacıyeva imzalayıblar.
Razılaşmaya əsasən, əməkdaşlıq əsasən Sakarya Uygulamalı Bilimlər Universitetinin orta ixtisas təhsilinə uyğun yüksək peşə məktəbləri ilə həyata keçiriləcək. Tərəflər orta ixtisas və tətbiqyönümlü təhsil, kənd təsərrüfatı, informasiya texnologiyaları, rəqəmsal transformasiya, idarəetmə və regional inkişaf istiqamətlərində birgə layihələr reallaşdıracaqlar.
Bununla yanaşı, tələbələr üçün layihə həftələri, müxtəlif müsabiqələr və hakatonların təşkili də nəzərdə tutulur.
Memorandum çərçivəsində dayanıqlı kənd təsərrüfatı, avtomobil texnologiyaları, informasiya texnologiyaları, kibertəhlükəsizlik, rəqəmsal kənd təsərrüfatı və süni intellekt sahələrində seminarlar, təlimlər və praktiki fəaliyyətlər keçiriləcək. Əməkdaşlıq həmçinin müəllim heyətinin peşəkar inkişafı, təcrübə mübadiləsi və işyeri əsaslı öyrənmə modellərinin paylaşılmasını da əhatə edəcək.
Üç il müddətinə qüvvədə olacaq memorandum hər iki təhsil müəssisəsinin imkanları çərçivəsində icra olunacaq. Tərəflər bu əməkdaşlığın tələbələrin bilik və bacarıqlarının artırılmasına, innovativ təhsil yanaşmalarının tətbiqinə və beynəlxalq əlaqələrin genişlənməsinə mühüm töhfə verəcəyini bildirirlər.
Qeyd edək ki, təhsil müəssisələrinin rəhbərlərinin növbəti görüşünün Zaqatalada keçirilməsi planlaşdırılır.
