Avqustun 8-də Mədəniyyət Nazirliyinin tabeliyində fəaliyyət göstərən incəsənət məktəb və mərkəzlərinə direktor, direktor müavini, eləcə də Azərbaycan və Naxçıvan Muxtar Respublikası Mədəniyyət nazirliklərinin tabeliyindəki incəsənət məktəb və mərkəzlərinə müəllim vəzifələri üzrə işə qəbul imtahanı keçiriləcək.
“Tehsil365” xəbər verir ki, bu barədə Dövlət İmtahan məlumat verilib.
Bildirilib ki, imtahan iki növbədə – saat 10:00 və 16:00-da təşkil olunacaq. Namizədlər buraxılış vərəqəsində göstərilən vaxtda imtahan binasında olmalıdırlar. Saat 09:45 və 15:45-dən sonra gələn şəxslər imtahana buraxılmayacaqlar.
Qeydiyyatdan keçmiş namizədlər DİM-in rəsmi internet səhifəsindən buraxılış vərəqəsini çap etməli, imtahana isə şəxsiyyəti təsdiq edən sənədin əsli və buraxılış vərəqəsi ilə gəlməlidirlər. Namizədlərə imtahandan əvvəl “Yaddaş kitabçası” ilə tanış olmaq da tövsiyə edilir.
Direktor və direktor müavinlərinin işə qəbulu üzrə imtahan 3 saat, müəllimlərin işə qəbulu imtahanı isə 2 saat davam edəcək.
Direktor və direktor müavinləri üçün imtahanda normativ hüquqi aktlar, pedaqogika və pedaqoji psixologiya, məntiqi təfəkkür və ümumi dünyagörüşü üzrə biliklər qiymətləndiriləcək. Bu istiqamət üzrə namizədlərə 100 qapalı tipli test tapşırığı təqdim olunacaq.
Müəllimlərin işə qəbulu imtahanında isə musiqi, təsviri sənət və xoreoqrafiya istiqamətləri üzrə ixtisas bilikləri ilə yanaşı, pedaqogika və pedaqoji psixologiya, məntiqi təfəkkür və ümumi dünyagörüşü yoxlanılacaq. Musiqi ixtisası üzrə namizədlərə suallar milli və klassik musiqi bölmələri üzrə təqdim ediləcək. Müəllimlər üçün imtahan 70 qapalı tipli test tapşırığından ibarət olacaq.
Hər düzgün cavab 1 balla qiymətləndiriləcək, səhv cavablar isə ümumi nəticəyə təsir göstərməyəcək.
İmtahan Bakıda DİM-in Elektron İmtahanlar Korpusunda, Naxçıvanda isə 4 nömrəli tam orta məktəbdə kompüter vasitəsilə keçiriləcək.
Ümumilikdə imtahanda 1350 namizəd iştirak edəcək. Onlardan 121-i direktor və direktor müavini, 1229-u isə müəllim vəzifəsi üzrə qeydiyyatdan keçib.
İmtahanın təşkili üçün 15 zal administratoru, 89 nəzarətçi-müəllim və 14 buraxılış rejimi əməkdaşı cəlb olunub.
DİM-dən bildirilib ki, imtahanda 5 nəfər görmə məhdudiyyətli namizəd də iştirak edəcək. Onların rahat şəkildə imtahan verməsi üçün xüsusi şərait yaradılıb, tapşırıqların oxunması, cavab kartlarının doldurulması və digər prosedurların yerinə yetirilməsi məqsədilə fərdi nəzarətçilər təyin olunub.