Azərbaycan Dillər Universitetinin (ADU) tələbələri Koreya Respublikasının İnha Universiteti ilə birgə həyata keçirilən “Qlobal iqlim böhranına qarşı mübarizə” adlı beynəlxalq layihənin hakaton mərhələsində uğurla çıxış ediblər.
“Tehsil365” xəbər verir ki, Layihə ADU ilə İnha Universiteti arasında 2019-cu ildə imzalanmış əməkdaşlıq memorandumu əsasında həyata keçirilir.
Bu il ikinci dəfə təşkil olunan hakatonun açılış mərasimi avqustun 1-də ADU-da, yekun təqdimat və mükafatlandırma mərasimi isə avqustun 5-də Bakı Mühəndislik Universitetində keçirilib.
Yekun mərhələdə koreyalı və azərbaycanlı tələbələrdən ibarət dörd komanda layihələrini təqdim edib. Hər komanda bir Koreya, bir Bakı Mühəndislik Universiteti və bir ADU tələbəsindən ibarət olub. Münsiflər heyətində ADU-nun baş müəllimi Püstəxanım Səlimxanova və Su və Meliorasiya Elmi Tədqiqat İnstitutunun Ekologiya şöbəsinin müdiri Günay Abbasova Azərbaycan tərəfini təmsil ediblər.
Müsabiqənin nəticələrinə əsasən, ADU-nun Tərcümə fakültəsinin Koreya dili ixtisası üzrə II kurs tələbəsi Məmmədli Zeynəbin üzv olduğu komanda “Aero-Weave Global” adlı layihə ilə I yerə, Zeynallı Röyanın üzv olduğu komanda isə “Eco Audit AI” adlı layihə ilə II yerə layiq görülüb. Qalib komandalara sertifikatlar və pul mükafatları təqdim olunub.
Digər ADU tələbələri – Qədirli Simuzər və Sultanlı Fidan da layihədə fəal iştirak edərək sertifikatlarla təltif olunublar.
Qeyd edək ki, sözügedən hakaton ADU, Bakı Mühəndislik Universiteti və İnha Universiteti arasında əməkdaşlıq çərçivəsində ikinci dəfə təşkil olunur. Layihənin ötənilki mərhələsində qalib olan iştirakçılar cari ilin may ayında Cənubi Koreyaya səfər edərək ekoloji təlim və tədbirlərdə iştirak etmək imkanı əldə ediblər.