“Psixoterapiya ilə bağlı cəmiyyətdə hələ də bir çox yanlış təsəvvürlər var və bu da insanların vaxtında dəstək almasına mane olur.”
Bu fikirləri psixoloq Nizami Orucov “Tehsil365”ə açıqlamasında bildirib.
Ən çox rast gəlinən fikirlərdən biri budur ki, “psixoloqa yalnız psixi xəstəliyi olan insanlar gedir”. Halbuki psixoterapiya təkcə xəstəliklə bağlı deyil. İnsanlar stress, təşviş, münasibət problemləri, yas, özünəinam, qərarvermə çətinliyi və ya sadəcə özünü daha yaxşı tanımaq üçün də psixoloqa müraciət edə bilərlər.
Digər yanlış fikir isə “güclü insan problemlərini özü həll etməlidir” düşüncəsidir. Əslində kömək istəmək zəiflik deyil. Necə ki, fiziki sağlamlıq problemi olduqda həkimə müraciət edirik, psixoloji çətinliklər zamanı da mütəxəssis dəstəyi almaq normal və sağlam yanaşmadır.
Bəziləri düşünür ki, psixoloq bir görüşdə bütün problemləri həll edəcək və ya hazır məsləhətlər verəcək. Halbuki psixoterapiya sehrli həll yolu deyil. Bu, insanın özünü daha yaxşı tanıdığı, düşüncə və davranışlarını anladığı, dəyişiklik üçün birlikdə çalışdığı bir prosesdir. Psixoloq insanın yerinə qərar vermir, ona daha sağlam qərarlar verməsi üçün dəstək olur.
Başqa bir yanlış fikir isə “danışmaqla problem həll olunmur” düşüncəsidir. Əslində psixoterapiyada əsas məqsəd sadəcə danışmaq deyil. Müxtəlif elmi metodlardan istifadə etməklə insanın düşüncə tərzi, emosional reaksiyaları və davranış nümunələri üzərində işlənilir.
Bəzi insanlar da psixoloqa müraciət etməyin onları “damğalayacağından” narahat olurlar. Halbuki son illərdə bu sahəyə münasibət xeyli dəyişib. Psixi sağlamlığa qayğı göstərmək artıq zəiflik yox, məsuliyyətli davranış kimi qəbul edilir.
Ən vacib məqam isə budur ki, psixoterapiyanın məqsədi insanı dəyişdirmək deyil, onun öz resurslarını kəşf etməsinə, çətinliklərlə daha sağlam mübarizə aparmasına və həyat keyfiyyətini artırmasına kömək etməkdir. Psixoloji dəstək almaq problemli olmaq demək deyil, insanın öz psixi sağlamlığına dəyər verdiyini göstərir.