Azərbaycan Dövlət Neft və Sənaye Universitetinin (ADNSU) tələbəsi Qusar rayonunda ilk dəfə təşkil olunan robototexnika yarışında münsif heyətində yer alıb.
“Tehsil365” xəbər verir ki, ADNSU-nun Mexatronika və robototexnika mühəndisliyi ixtisasının 2-ci kurs tələbəsi Yusif Salahlı Qusar Rayon Heydər Əliyev Mərkəzində keçirilən regional yarışda hakim qismində çıxış edib.
Quba-Xaçmaz Regional Gənclər və İdman İdarəsinin təşəbbüsü, Qusar Rayon İcra Hakimiyyətinin dəstəyi və "Kavkaz Robotics School"un təşkilatçılığı ilə baş tutan turnir “Mini Sumo” kateqoriyası üzrə təşkil olunub.
Yarış çərçivəsində ADNSU tələbəsi Yusif Salahlı yarışın gedişatına, qaydaların düzgün tətbiqinə, eləcə də iştirakçı robotların texniki quruluşuna və təhlükəsizlik parametrlərinə nəzarət edib.
Qeyd edək ki, gənc mühəndislərin regional layihələrdə və bu cür texnoloji yarışlarda ekspert, hakim qismində cəlb olunması tələbələrin praktiki bacarıqlarının və yüksək peşəkarlıq səviyyəsinin göstəricisidir.