“Şəhidin səsi” proqramının növbəti buraxılışı Vətən müharibəsində şəhid olan Yalçın Cavadovun əziz xatirəsinə həsr olunacaq.
“Tehsil365” xəbər verir ki, proqramın növbəti buraxılışı 10 avqust saat 18:00-da yayımlanacaq. Buraxılışın aparıcısı “Tehsil365” İnformasiya Agentliyinin “Könüllü müxbir” layihəsində könüllü müxbir kimi fəaliyyət göstərən Fəridə Sadıqzadə olacaq.
Cavadov Yalçın Aydın oğlu 1985-ci il mayın 19-da Şamaxı rayonunun Sabir qəsəbəsində anadan olub. 1992-2002-ci illərdə A. Alxanov adına qəsəbə tam orta məktəbində təhsil alıb.
Yalçın Cavadov 2003-2005-ci illərdə Dövlət Sərhəd Xidmətinin Naxçıvan şəhərində yerləşən “N” saylı hərbi hissəsində müddətli həqiqi hərbi xidmət keçib. 2017-ci ildən isə müddətdən artıq həqiqi hərbi xidmət qulluqçusu kimi xidmət edib.
Azərbaycan Ordusunun çavuşu olan Yalçın Cavadov 2020-ci il sentyabrın 27-də başlayan Vətən müharibəsi zamanı Füzulinin azadlığı uğrunda gedən döyüşlərdə iştirak edib. O, oktyabrın 9-da Füzuli döyüşləri zamanı şəhid olub.
Şəhid Yalçın Cavadov Şamaxı şəhərinin Şəhidlər Xiyabanında dəfn edilib. Ailəli olan şəhidimizin 1 qızı və 2 oğlu yadigar qalıb.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Prezident İlham Əliyevin Sərəncamlarına əsasən Yalçın Cavadov ölümündən sonra “Vətən uğrunda” və “Füzulinin azad olunmasına görə” medalları ilə təltif edilib.
“Şəhidin səsi”nin növbəti buraxılışında şəhid Yalçın Cavadovun həyat yolu, hərbi xidməti, Vətən müharibəsində göstərdiyi qəhrəmanlıq və onun ailəsinə yadigar qalan xatirələrdən söz açılacaq.
Qeyd edək ki, “Şəhidin səsi” proqramı 10 avqust saat 18:00-da yayımlanacaq.