Naxçıvan Dövlət Universitetinin “İqtisadiyyat və marketinq” kafedrasının müəllimi Elşən Nəsirov vəfat edib.
“Tehsil365” xəbər verir ki, Nəsirov Elşən Nurəddin oğlu 29 sentyabr 1964-cü ildə Naxçıvan şəhərində anadan olmuşdur. Orta təhsilini Bakı şəhərində almış və 1979-cu ildə Bakı Politexnik Texnikumuna qəbul olmuş və 1983-cü ildə həmin təhsil müəssisəsini bitirmişdir.
Elşən Nəsirov əmək fəaliyyətinə 1983-cü ildə Bakı şəhərində ən texnik vəzifəsində başlamışdır. Sonrakı illərdə müxtəlif müəssisə və təşkilatlarda iqtisadiyyat, idarəetmə və rəhbər vəzifələrdə çalışmış, zəngin peşəkar təcrübə qazanmışdır.
2000–2002-ci illərdə Naxçıvan Özəl Universitetinin Humanitar Elmlər kafedrasında müəllim, 2002–2011-ci illərdə Naxçıvan şəhərində “İdeal” firmasının direktoru vəzifəsində çalışmışdır. Sonrakı illərdə də müxtəlif müəssisələrdə rəhbər və mütəxəssis kimi fəaliyyətini davam etdirmişdir.
2020-ci ildən Naxçıvan Dövlət Universitetinin “İqtisadiyyat və marketinq” kafedrasında müəllim kimi çalışmış, bilik və təcrübəsinin gənc nəslə ötürülməsinə öz töhfəsini vermişdir.
Naxçıvan Dövlət Universitetinin rəhbərliyi və kollektivi Elşən Nəsirovun vəfatından kədərləndiyini bildirir, mərhumun ailəsinə və yaxınlarına dərin hüznlə başsağlığı verir.
Allah rəhmət eləsin!