Azərbaycan Rəssamlıq Akademiyası tələbələrin yaradıcılıq potensialının beynəlxalq müstəvidə tanıdılması, onların qlobal incəsənət məkanına inteqrasiyası və peşəkar inkişafının təmin edilməsi istiqamətində layihələri davam etdirir.
Akademiyadan “Tehsil365”ə bildirilib ki, son dövrdə Akademiyanın xarici ali təhsil müəssisələri, muzeylər, qalereyalar və mədəniyyət təşkilatları ilə əməkdaşlığı əhəmiyyətli dərəcədə genişlənib. Türkiyənin Memar Sinan İncəsənət Universiteti, Bilecik Şeyx Ədəbalı Universiteti, Özbəkistan Rəssamlıq Akademiyası, Temirbek Jurgenov adına Qazax Milli İncəsənət Akademiyası, Turqunbay Sadıkov adına Milli İncəsənət Akademiyası, Arkın Yaradıcı Sənətlər və Dizayn Universiteti, Macarıstan Rəssamlıq Universiteti və digər nüfuzlu ali təhsil müəssisələri ilə qurulan əlaqələr tələbə və müəllim mübadiləsi, ortaq sərgilər, ustad dərsləri, elmi-praktik konfranslar və yaradıcılıq layihələri üçün yeni imkanlar yaradıb. Akademiyanın beynəlxalq fəaliyyətində mühüm addımlardan biri Türk Dövlətləri Təşkilatına üzv ölkələrin İncəsənət üzrə Ali Təhsil Müəssisələri Rektorlar Şurasının yaradılması olub. Azərbaycan Rəssamlıq Akademiyasının təşəbbüsü ilə təsis edilən platforma Türk dünyasında incəsənət təhsili sahəsində institusional əməkdaşlığın gücləndirilməsinə, tələbə və müəllim mobilliyinin artırılmasına, ortaq sərgi, biennale, plener və yaradıcılıq layihələrinin həyata keçirilməsinə xidmət edir.
Akademiyanın beynəlxalq əməkdaşlıq layihələri çərçivəsində tələbələr xarici ölkələrdə təşkil olunan yaradıcılıq proqramlarına da cəlb olunurlar. Akademiya xarici ali təhsil müəssisələri ilə birgə layihələrin, tələbə mübadilələrinin və beynəlxalq yaradıcılıq proqramlarının sayının artırılmasını, tələbələrin biennalelər, forumlar, rezidensiyalar və digər qlobal sənət platformalarında iştirak imkanlarının genişləndirilməsini prioritet istiqamətlərdən biri kimi müəyyən edib.