Müasir dövrdə şagirdlərin diqqətinin tez yayınması və dərslərə qarşı motivasiya əskikliyi təhsil sisteminin ən aktual problemlərindən biridir. Mövzu ilə bağlı TEHSİL365-ə özəl açıqlama verən psixoloq Fuad Əsədov bildirib ki, problemin kökündə məktəblərdə psixoloji işin düzgün qurulmaması və tədrisin maraqlı təşkil edilməməsi dayanır.
Fuad Əsədovun sözlərinə görə, ilk növbədə məktəblərdə psixoloqlar uşaqlarla sistemli şəkildə iş aparmalıdırlar:
"Məktəb yaşları, xüsusilə yeniyetməlik dövrü uşaqların dünyanı kəşf etməyə başladıqları mərhələdir. Bu dövrdə onların diqqəti çox asanlıqla yayına bilir. Belə bir vaxtda onlara dərslərin və gələcək məqsədlərə doğru addımlamağın önəmi uşaqların öz dili ilə başa salınmalıdır. Uşaqlar uşaq olduqları üçün bəzi şeyləri müstəqil analiz edə bilmirlər, ona görə də onlara bunu düzgün yönləndirən mütəxəssis lazımdır."
"Əzbərlətmək və cəza üsulu faydasızdır"
Psixoloq vurğulayıb ki, uşaqlara təhsili sadəcə "Dərsi oxu, yoxsa aşağı qiymət alacaqsan, cəzalanacaqsan" prinsipi ilə sevdirmək mümkün deyil:
"Uşaqlar başa düşməlidirlər ki, həmin dərsi nəyə görə oxuyurlar və o mövzu nə üçün maraqlıdır. Şagirdlər arasında 'Trigonometriya və ya tarix həyatda heç vaxt lazım olmayacaq' kimi düşüncələr geniş yayılıb. Elm və fənlərin nə üçün öyrənilməli olduğunu bilməyən uşağın istər-istəməz motivasiyası düşür və o, fikrini başqa şeylərə yönəldir. Bura həm psixoloqlar, həm də peşəkar müəllimlər cəlb olunmalı, elmin faydası uşaqlara düzgün izah edilməlidir."
Təhsil interaktiv və praktiki olmalıdır
F. Əsədov dərslərin əzbərçilikdən uzaq, əyləncəli və praktiki üsullarla keçirilməsinin vacibliyini qeyd edib:
"Kimya və fizika fənlərində mütləq təcrübələr göstərilməli, uşaqlar o prosesləri öz gözləri ilə görməlidirlər. İnteraktiv dərs metodları, sənədli filmlərin nümayişi, fizika dərslərində imkan varsa rəsədxanaya gedilməsi və ya sadə teleskoplardan istifadə olunması uşaqda böyük maraq oyadır. Dərs həm əyləncəli, həm də praktiki olmalıdır. Əgər məktəb mühiti uşaq üçün maraqlı olarsa, daxili öyrənmə həvəsi də öz-özünə yaranacaq. Əks halda, sadəcə qiymətlə dəyərləndirmək və cəzalandırmaq üsulları tamamilə faydasızdır."