Odlar Yurdu Universiteti ilə Ukraynanın nüfuzlu dövlət ali təhsil müəssisələrindən olan V. N. Karazin adına Xarkov Milli Universiteti arasında bakalavr səviyyəsində “Biologiya” və “İnformasiya texnologiyaları” ixtisasları üzrə iki müstəqil diplomun verilməsini nəzərdə tutan Beynəlxalq İkili Diplom Proqramı Azərbaycan Respublikasının Elm və Təhsil Nazirliyi tərəfindən təsdiqlənmişdir.
“Tehsil365” xəbər verir ki, Tədrisin ingilis dilində həyata keçiriləcəyi və 4 təhsil ilini əhatə edəcəyi proqram tələbələrə hər iki universitetin akademik imkanlarından yararlanmaq, müxtəlif təhsil və elmi mühitlərdə bilik və bacarıqlarını inkişaf etdirmək, həmçinin beynəlxalq təcrübə qazanmaq imkanı təqdim edir. Proqramın akademik tələblərini uğurla yerinə yetirən məzunlar hər iki universitetin ayrı və müstəqil bakalavr diplomunu əldə edə biləcəklər.
Beynəlxalq İkili Diplom Proqramının əsas məqsədi “Biologiya” və “İnformasiya texnologiyaları” sahələrində müasir nəzəri və praktiki biliklərə, geniş elmi dünyagörüşünə, ingilis dilində akademik ünsiyyət bacarıqlarına və beynəlxalq əmək bazarının tələblərinə uyğun peşəkar səriştələrə malik mütəxəssislər hazırlamaqdır.
Proqram çərçivəsində tələbələr:
4 təhsil ili ərzində təhsillərini ingilis dilində davam etdirmək;
hər iki universitetin akademik və elmi potensialından yararlanmaq;
fərqli tədris metodları və elmi yanaşmalarla tanış olmaq;
beynəlxalq akademik mühitdə təhsil təcrübəsi qazanmaq;
nəzəri biliklərini praktiki və tədqiqat bacarıqları ilə zənginləşdirmək;
beynəlxalq əməkdaşlıq və mədəniyyətlərarası ünsiyyət bacarıqlarını inkişaf etdirmək;
iki müstəqil bakalavr diplomu əldə etmək
imkanı qazanacaqlar.
Bu proqram tələbələr üçün yalnız keyfiyyətli ali təhsil deyil, eyni zamanda beynəlxalq akademik mühitə inteqrasiya, gələcək magistratura təhsili, elmi-tədqiqat fəaliyyəti və uğurlu peşəkar karyera istiqamətində yeni imkanlar deməkdir.
İnformasiya və ictimaiyyətlə əlaqələr departamenti
(+994 55) 465 85 27