Sumqayıt Dövlət Universitetinin rektoru, professor Nurəli Yusifbəylinin rəhbərlik etdiyi nümayəndə heyəti SOCAR “Azərikimya” İstehsalat Birliyində işgüzar görüş keçirib.
“Tehsil365” xəbər verir ki, Görüşdə ali təhsil müəssisələri ilə sənaye sektoru arasında əməkdaşlığın institusional əsaslarının inkişaf etdirilməsi, kimya və neft-kimya sənayesi üçün rəqabətqabiliyyətli mühəndis kadrlarının hazırlanması, istehsalat təcrübələrinin məzmununun zənginləşdirilməsi, elmi-tədqiqat fəaliyyətinin istehsalatın prioritet istiqamətləri ilə uzlaşdırılması və innovativ texnoloji həllərin tətbiqi məsələləri ətrafında geniş müzakirələr aparılıb.
Rektor Nurəli Yusifbəyli çıxışında universitet–sənaye tərəfdaşlığının insan kapitalının inkişafı və elmtutumlu iqtisadiyyatın formalaşdırılması baxımından mühüm əhəmiyyət daşıdığını qeyd edib. O, Sumqayıt Dövlət Universitetində mühəndis təhsilinin müasir yanaşmalar əsasında yenilənməsi, praktiki hazırlığın gücləndirilməsi və sənayenin tələblərinə uyğun kompetensiyaların formalaşdırılması istiqamətində həyata keçirilən tədbirlər barədə məlumat verib.
Bildirilib ki, istehsalat müəssisələri ilə sistemli əməkdaşlıq tələbələrin peşə bacarıqlarının real istehsalat mühitində inkişaf etdirilməsinə, tədris proqramlarının əmək bazarının tələblərinə uyğunlaşdırılmasına və məzunların məşğulluq imkanlarının genişlənməsinə mühüm töhfə verir. Bu çərçivədə birgə elmi və tətbiqi layihələrin həyata keçirilməsi, tələbələrin istehsalat və təcrübə proqramlarının genişləndirilməsi, müəssisənin rəhbər və aparıcı mütəxəssislərinin universitetdə ustad dərslərinə cəlb olunması, həmçinin kadr hazırlığı istiqamətində uzunmüddətli əməkdaşlıq mexanizmlərinin formalaşdırılması məsələləri nəzərdən keçirilib.
SOCAR “Azərikimya” İstehsalat Birliyinin baş direktoru Elnur Məmmədli bildirib ki, müəssisədə həyata keçirilən rəqəmsal transformasiya, istehsalat proseslərinin avtomatlaşdırılması və müasir texnoloji həllərin tətbiqi sənayenin yüksək ixtisaslı, yeni nəsil bilik və bacarıqlara malik mühəndis kadrlara olan tələbatını daha da artırır. Onun sözlərinə görə, bu şəraitdə ali təhsil müəssisələri ilə istehsalat arasında əməkdaşlığın gücləndirilməsi müasir əmək bazarının tələblərinə uyğun insan kapitalının formalaşdırılması baxımından xüsusi əhəmiyyət daşıyır.
Elnur Məmmədli qeyd edib ki, Sumqayıt Dövlət Universitetində hazırlanan mütəxəssislərin müasir proqram təminatı, avtomatlaşdırılmış idarəetmə sistemləri və rəqəmsal istehsal texnologiyaları üzrə bilik və bacarıqlarının inkişaf etdirilməsi sənayenin gələcək kadr ehtiyaclarının təmin olunmasına mühüm töhfə verə bilər. Bu baxımdan universitetlə əməkdaşlığın genişləndirilməsi, kadr hazırlığı prosesinin istehsalatın real tələbləri ilə uzlaşdırılması və birgə fəaliyyət istiqamətlərinin sistemli şəkildə inkişaf etdirilməsi məqsədəuyğun hesab olunub.
Baş direktor, həmçinin tələbələrin innovasiya və startap ekosistemində fəal iştirakının təşviq edilməsinin, enerji, kimya və mühəndislik istiqamətləri üzrə təhsil alan tələbələrin müəssisədə istehsalat təcrübələrinə cəlb olunmasının, tətbiqi layihələrdə iştirakının və istehsalat mühitində praktiki bacarıqlarının inkişaf etdirilməsinin həm gənc mütəxəssislərin peşəkar formalaşmasına, həm də müəssisənin perspektiv kadr ehtiyatının gücləndirilməsinə xidmət edəcəyini vurğulayıb.
Görüş çərçivəsində tərəfdaşlığın yeni inkişaf mərhələsinə keçidini təmin edəcək çərçivə əməkdaşlıq sənədinin hazırlanması və imzalanması barədə qarşılıqlı razılıq əldə olunub. Bu sənədin ali təhsil, elm, innovasiya və istehsalat arasında qarşılıqlı əlaqələrin dərinləşdirilməsinə, sənayenin ehtiyaclarına uyğun yüksək ixtisaslı kadr hazırlığının keyfiyyətinin artırılmasına və regionun innovasiya ekosisteminin inkişafına mühüm töhfə verəcəyi vurğulanıb.