Azərbaycan Tibb Universiteti (ATU) bu dəfə də ali təhsilin rezidentura səviyyəsi üzrə ixtisasları, o cümlədən cərrahi yönümlü rezidentura ixtisaslarının ümumi strukturu, karyera imkanları və iş yerləri və s. haqda əsas məlumatları diqqətə çatdırır.
“Tehsil365” xəbər verir ki, Rezidentura pilləsində seçilən cərrahi ixtisaslar bazadır. Təhsili bitirdikdən sonra həkim-mütəxəssis statusu qazanılır. Bununla yanaşı, mütəxəssislər gələcəkdə daha dar sahələrə (sub-ixtisaslaşmalara) yönələ bilərlər:
Ümumi cərrahiyyə: Laparoskopik, bariatrik (arıqlama), hepatobiliar (qaraciyər-öd) və ya koloproktoloji cərrahiyyə.
Ürək-damar cərrahiyyəsi: Flebologiya (damar), uşaq kardiocərrahiyyəsi və ya invaziv kardio-vaskulyar sahə.
Plastik cərrahiyyə: Estetik cərrahiyyə, rekonstruktiv mikrocərrahiyyə, yanıq cərrahiyyəsi.
Travmatologiya və ortopediya: Artroskopiya, oynaq protezləşdirilməsi, uşaq ortopediyası, onurğa cərrahiyyəsi (spinal).
Urologiya: Andrologiya, endourologiya, uşaq urologiyası.
Oftalmologiya / LOR: Refraktiv cərrahiyyə (lazer korreksiyası), vitreoretinal cərrahiyyə / Otocərrahiyyə, rinoplastika, baş-boyun cərrahiyyəsi.
Karyera imkanları və inkişaf yolları
Klinik inkişaf: Sıravi həkim-rezidentlikdən başlayaraq şöbə müdiri, baş həkim və ya aparıcı cərrah mövqeyinə yüksəlmək.
Akademik və elmi fəaliyyət: Tibb universitetlərində və tədqiqat institutlarında müəllim, dosent, professor kimi fəaliyyət göstərmək, elmi dərəcələr (fəlsəfə doktoru, elmlər doktoru) almaq.
Beynəlxalq təcrübə və “fellowship”: Rezidenturadan sonra xaricdə (Türkiyə, Avropa və s.) ödənişli/təqaüdlü qısamüddətli və ya uzunmüddətli təcrübə (fellowship) keçərək dar sahadə ixtisaslaşmaq.
Özəl praktika və konsultantlıq: Təcrübə topladıqdan sonra fərdi tibbi xidmətlər göstərmək və ya özəl klinikaların eksperti olmaq.
Məzunların çalışa biləcəyi müəssisələr
Dövlət tibb müəssisələri: Təcili tibbi yardım xəstəxanaları, şəhər və rayon mərkəzi xəstəxanaları, elmi-tədqiqat institutları (məsələn, Elmi Cərrahiyyə Mərkəzi, Milli Onkologiya Mərkəzi və s.).
Özəl klinika və hospital şəbəkələri: Müasir cərrahi bloku və stasionarı olan özəl tibb mərkəzləri.
Təhsil və universitet klinikaları: Azərbaycan Tibb Universitetinin nəzdindəki tədris klinikaları və laboratoriyalar.
Estetik və ixtisaslaşmış mərkəzlər: Plastik cərrahiyyə, kosmetologiya, göz klinikaları, LOR mərkəzləri və andrologiya/reproduktiv sağlamlıq kompleksləri.
Cərrahiyyə sahəsində uğurlu karyera qurmaq üçün davamlı praktik vərdişlər, beynəlxalq konfranslarda iştirak və müasir texnologiyaları (minimal invaziv, robotik cərrahiyyə) mənimsəmək əsas amillərdəndir.