Azərbaycan Dövlət Neft və Sənaye Universitetinin (ADNSU) 3 aylıq Məzun–Tələbə Mentorluq Proqramı çərçivəsində mentorlar və tələbələr arasında görüşlər davam edir.
“Tehsil365” xəbər verir ki, proqram çərçivəsində keçirilən görüşlərdə ADNSU məzunları mentor qismində tələbələrlə bir araya gəlir, öz peşəkar təcrübələrini və peşəkar karyeralarında qazandıqları bilikləri onlarla bölüşürlər. Görüşlər zamanı tələbələri maraqlandıran suallar cavablandırılır, onların karyera planları, peşəkar inkişaf istiqamətləri və gələcək fəaliyyətləri ilə bağlı fikir mübadiləsi aparılır.
Həm onlayn, həm də əyani formatda təşkil olunan görüşlərdə mentorlar tələbələrə əmək bazarının tələbləri, iş həyatına hazırlıq, şəxsi və peşəkar bacarıqların inkişaf etdirilməsi, karyera imkanlarının düzgün qiymətləndirilməsi ilə bağlı praktiki tövsiyələr verirlər.
Qeyd edək ki, ADNSU-da tələbə və məzunların peşəkar inkişafını dəstəkləyən 3 aylıq "Tələbə-Məzun Mentorluq Proqramı" fəaliyyət göstərir. Tələbələrin karyerasını düzgün istiqamətləndirmək, peşəkar bacarıqlarını artırmaq və real iş təcrübəsi qazandırmaq məqsədi daşıyan proqram çərçivəsində 14 mentor tələbələrlə fərdi və qrup formasında görüşlər keçirir.