“Son zamanlarda gənclərdə ən çox rast gəlinən psixoloji problemlər sırasında təşviş, depressiv əlamətlər, özünəinamın azalması, emosional tükənmə, sosial təcrid və motivasiya problemləri xüsusi yer tutur”.
Bu fikirləri “Tehsil365” ə açıqlamasında psixoloq Mətanət Əliyeva deyib.
Psixoloq bildirib ki, müasir gənclər bir tərəfdən təhsil, karyera və gələcəklə bağlı yüksək gözləntilərlə, digər tərəfdən isə sosial mühit və rəqəmsal dünyanın yaratdığı əlavə təzyiqlərlə qarşılaşırlar. Xüsusilə narahatlıq və təşviş halları gənclərdə daha çox nəzərə çarpır. Gələcəklə bağlı qeyri-müəyyənlik, uğursuzluq qorxusu, imtahanlar, iş tapmaq və maddi müstəqillik qazanmaq kimi məsələlər davamlı daxili gərginlik yarada bilər. Bu gərginlik uzun müddət davam etdikdə yuxu problemləri, diqqət dağınıqlığı, əsəbilik, tez yorulma və müxtəlif somatik şikayətlərlə də özünü göstərə bilər.
“Digər aktual problemlərdən biri emosional tükənmədir. Gənclərdən daim uğurlu, məhsuldar və aktiv olmaq gözlənilir. Təhsil, iş və şəxsi həyat arasında balans qurulmadıqda insan özünü tükənmiş, motivasiyasız və emosional olaraq boş hiss edə bilər. Bəzən isə bu vəziyyət sadəcə yorğunluq kimi qəbul edilir və problem dərinləşənə qədər psixoloji dəstəyə müraciət edilmir. Müasir dövrdə ekran və sosial media asılılığı da ayrıca diqqət tələb edən məsələlərdəndir. Sosial şəbəkələrdə başqalarının ideal həyat görüntülərinə davamlı baxmaq gənclərdə müqayisə, yetərsizlik hissi və öz bədənindən və ya həyatından narazılıq yarada bilər. Eyni zamanda gec saatlara qədər telefondan istifadə yuxu rejiminə, diqqətə və gündəlik funksionallığa mənfi təsir göstərə bilər. Virtual ünsiyyətin artması bəzi gənclərdə real sosial münasibətlərin zəifləməsinə və tənhalıq hissinin güclənməsinə də səbəb ola bilir”.
Onun sözlərinə görə, bununla yanaşı, münasibətlərdə çətinliklər, ailə ilə konfliktlər, şəxsiyyət və özünü tanıma problemləri, perfektsionizm və özünü daim başqaları ilə müqayisə etmək də gənclərin psixoloji vəziyyətinə ciddi təsir göstərir. Bəzi hallarda bu problemlər özünəqapanma, aqressiya, riskli davranışlar və ya özünəzərər davranışlarına qədər inkişaf edə bilər. Burada vacib məqam hər bir kədər, yorğunluq və ya narahatlığı dərhal psixoloji pozuntu kimi qiymətləndirməməkdir. Lakin bu əlamətlər uzun müddət davam edirsə, gəncin təhsilinə, işinə, münasibətlərinə və gündəlik həyatına təsir göstərirsə, artıq mütəxəssis dəstəyinə müraciət etmək məqsədəuyğundur.
“Mən hesab edirəm ki, gənclərlə bağlı ən vacib məsələlərdən biri onların problemlərini kiçiltməmək və “sənin yaşında nə problemin ola bilər?” yanaşmasından uzaq durmaqdır. Bəzən gəncin ehtiyac duyduğu ilk şey məsləhət deyil, sadəcə mühakimə olunmadan dinlənilmək və başa düşüldüyünü hiss etməkdir”-deyə Mətanət Əliyeva qeyd edib.