"I ixtisas qrupu çox şanslı qrupdur. Burada plan yerlərinin sayı 20 150-dirsə, onların 75 faizi, yəni 15 200 yer dövlət sifarişlidir".
“Tehsil365” xəbər verir ki, bu sözləri Dövlət İmtahan Mərkəzinin İdarə Heyətinin sədri Məleykə Abbaszadə DİM-in “YouTube” və “Facebook” səhifələrində ixtisas seçimi edəcək abituriyentlərin diqqət yetirməli olduğu vacib məqamlarla bağlı canlı yayımda səsləndirib.
O bildirib ki, I ixtisas qrupu üzrə plan yerlərinin 75 faizi dövlət sifarişi əsasında ayrılıb:
“Keçən ilki keçid ballarına biz nə dərəcədə güvənə bilərik? Bilirsiniz ki, bu il I qrupda RK alt qrupu var və Rİ alt qrupu var. Birincisi, onu qeyd etmək istəyirəm ki, I qrup çox şanslı qrupdur. Burada plan yerlərinin sayı 20 150-dirsə, onların 75 faizi, yəni 15 200 yer dövlət sifarişlidir.
Bu nə deməkdir? Bu o deməkdir ki, bu ixtisaslara, bu peşələrə gələcəkdə əmək bazarında tələbat yüksəkdir. İndi də hökumət bu təhsil siyasətini həyata keçirir ki, bu ixtisaslara gələn şəxslər dövlətin hesabına təhsil ala bilsinlər".
RK alt qrupunda 200 baldan yuxarı nəticə göstərən hər bir şəxs qəbul oluna bilər:
"I qrupda iki alt qrup var. RK alt qrupunda plan yerlərinin sayı 12 710-dur. Müsabiqəyə buraxılan, 200 baldan yuxarı nəticə göstərən şəxslərin sayı isə 7 667-dir. Bu o deməkdir ki, 200 baldan yuxarı nəticə göstərən hər bir şəxs I ixtisas qrupunun RK alt qrupunda qəbul oluna bilər.
Hətta burada 150 baldan yuxarı nəticə göstərənlərin sayı 12 622-dir, plan yerlərinin sayı isə 12 710-dur. Bu o deməkdir ki, 150 baldan yuxarı nəticə göstərənlər bu alt qrupda özləri üçün yer tapa bilərlər. Hətta bundan sonra da RK alt qrupunda subbakalavrlar üçün müəyyən qədər yer qalacaq".
Rİ alt qrupunda müsabiqə vəziyyəti daha gərgindir:
"Rİ alt qrupunda plan yerlərinin sayı 7 440-dır. Müsabiqəyə 200 baldan yuxarı nəticə göstərənlərin sayı isə 8 000-dir. Görürsünüz ki, Rİ alt qrupunda müsabiqə vəziyyəti daha gərgindir və 8 000 nəfərdən yalnız 7 440-ı qəbul olunacaq.
250 baldan yuxarı nəticə göstərənlərin sayı isə 10 999-dur. Keçən il bu alt qrupda kifayət qədər subbakalavr da qəbul olunmuşdu. Ola bilsin, bu il də birinci qəbuldan sonra kimlərsə bu ixtisasları qeyd etməsələr, subbakalavrlara yer qalsın. Amma düşünürəm ki, elə də çox olmayacaqdır”.