Müasir dünyada təhsil təkcə sosial sahə deyil, həm də dövlətlərin geoiqtisadi və geosiyasi rəqabətində əsas güc alətidir. Bəs Azərbaycanın təhsil sistemi ölkəmizin regiondakı liderlik iddialarını və strateji hədəflərini nə dərəcədə dəstəkləyir?
Məsələ ilə bağlı politoloq Tofiq Abbasov “Tehsil365”*ə öz dəyərli fikirlərini bölüşüb:
"Təhsil sistemi elə bir dinamik sahədir ki, burada günbəgün, bəlkə də saatbasaat dəyişikliklər baş verir. Bu sahədə islahatlara həmişə geniş meydan verilir və həmin islahatlar öz konstruktiv rolunu oynayır. İslahatların ana xəttini tədris proqramlarının genişləndirilməsi, tədris ocaqlarında elmlərin daha dərindən mənimsədilməsi və şagirdlərlə tələbələrin bilik əldə etməyə həvəsinin artırılması təşkil edir.
Hər yerdə olduğu kimi, bizdə də özümüzəməxsus spesifik problemlər mövcuddur. İndi görürük ki, humanitar sahədə mütəxəssislərimiz və tələbələrimiz fəaldırlar. Lakin bu, günün tələblərinə tam cavab verən göstərici deyil. Əksinə, biz texniki elmləri gücləndirməliyik. Təsadüfi deyil ki, AMEA da iki istiqamətə — humanitar və texniki sahələrə ayrıldı.
Bizim texnoloji suverenliyi qazanmağımız üçün texniki sahəyə diqqətimiz kəskin artmalıdır. Həvəsləndirici mexanizm və modelləri həm işləyib hazırlamalı, həm də tətbiq etməliyik. Dünyada mütərəqqi hesab olunan startap mühitini ali təhsil ocaqlarında geniş tətbiq etməliyik.
Bu gün Azərbaycanın müdafiə sisteminə böyük ehtiyacı var. Dövlət rəhbərliyi ordumuza və müdafiə sistemimizə hər zaman artan büdcə ayırır. Biz ən son, müasir silahları əldə edirik, həmçinin Slovakiya, Rusiya və digər ölkələrlə hərbi-sənaye kompleksi sahəsində əməkdaşlıq edirik. Lakin indi hazırladığımız kadrları məhz bu sahələrə yönəltməliyik ki, onlar elmi tədqiqatlar aparsınlar, startaplarda öz imkanlarını reallaşdırsınlar və biz idxaldan olan asılılığımızı azaldaq.
Texniki tədris sahəsindəki boşluqları mütləq doldurmalıyıq. Universitetlər və fakültələr iqtisadi kompleksimizin ehtiyaclarını nəzərə alaraq tədris proqramlarını yeniləməli, ciddi islahatlar aparmalıdırlar. İndi süni intellekt və rəqəmsallaşma dövrüdür. Azərbaycan Şərq-Qərb və Şimal-Cənub nəqliyyat dəhlizləri kimi beynəlxalq layihələrdə aparıcı qüvvədir. Dənizin dibi ilə kabel çəkilir, süni intellekt bacarıqları yeni sahələrə tətbiq olunur. Bütün bunlar tədris proqramlarında öz əksini tapmalıdır.
Ali təhsil müəssisələri və kolleclər öz fəaliyyətini bu ruha uyğun qurmalı, islahatları sürətləndirməlidirlər. Dünyada böyük rəqabət var; vaxtında lazımi texnologiyaları ala bilməyən ölkələr geridə qalırlar. Biz də xarici asılılığımızı azaltmalı, ən vacib sahələrdə özümüzü yeni texnologiyalar və 'know-how'larla təmin etməliyik."