"12-ci Bakı Beynəlxalq Kitab Sərgisinin keçirilməsi yalnız kitab satışı və ədəbiyyatın təbliği baxımından deyil, uşaqların və yeniyetmələrin mütaliə vərdişlərinin formalaşdırılması baxımından da ciddi imkan yaradır. Lakin belə böyük tədbirlər keçirilərkən məktəblilərin iştirakının niyə daha yüksək səviyyədə olmadığı sual doğurur".
Bu fikirləri “Tehsil365”ə açıqlamasında təhsil eksperti Əli Ələkbərov deyib. O bildirib ki, problemin əsas səbəbi uşaqların kitaba marağının olmaması ilə əlaqələndirilməməlidir.
“Uşağı kitab sərgisinə gətirmək üçün sadəcə “kitab oxuyun” demək kifayət etmir. Bu gün məktəblinin diqqəti çoxsaylı alternativlərlə bölünür. Ona görə də kitab sərgisi şagird üçün maraqlı, interaktiv və canlı bir mühitə çevrilməlidir.
Məktəb və kitab sərgisi arasında daha sistemli əməkdaşlığa ehtiyac var. Məktəblilərin sərgiyə təsadüfi şəkildə deyil, əvvəlcədən hazırlanmış proqram əsasında aparılması daha məqsədəuyğun olar. Məsələn, şagird üçün konkret müəlliflə görüş, kitab təqdimatı, müzakirə, viktorina, yaradıcılıq müsabiqəsi və ya seçdiyi kitabı təqdim etmək imkanı yaradılarsa, onun sərgidə iştirakı formal ekskursiyadan daha çox öyrənmə prosesinə çevrilər”.
Ekspertin sözlərinə görə, bu prosesdə müəllim və valideynlərin də üzərinə mühüm məsuliyyət düşür.
“Uşağın kitab oxumasını istəyiriksə, bunu yalnız məktəbin üzərinə qoymaq olmaz. Evdə və məktəbdə kitaba, mütaliəyə münasibət dəyişməlidir.
Əslində, kitab sərgisinin məqsədi məktəblini sadəcə sərgi ərazisinə gətirmək yox, onu kitabın dünyasına daxil etmək olmalıdır. Bunun üçün məktəblilər üçün ayrıca proqramların, yaş qruplarına uyğun tədbirlərin və interaktiv layihələrin sayını artırmaq lazımdır.
Məktəblinin kitab sərgisində iştirakı “məktəb tapşırığı” kimi yox, onun səbirsizliklə gözlədiyi bir tədbirə çevrilməlidir. Əgər bunu bacarsaq, həm sərgiyə maraq artacaq, həm də uzunmüddətli perspektivdə uşaqların mütaliə vərdişlərinin formalaşmasına ciddi töhfə vermiş olacağıq”.