Amerikalı alimlərin apardığı son neyrobioloji araşdırmalar öyrənmə prosesi ilə bağlı vacib bir mexanizmi üzə çıxarıb.
“Tehsil365” xəbər verir ki, beyin yeni məlumatı qəbul etdikdən dərhal sonra – hətta bir neçə saniyəlik qısa fasilələrdə belə - həmin informasiyanı sürətli şəkildə "təkrar edir". Bu kəşf həm məktəblilərin, həm də abituriyentlərin dərs oxuma vərdişlərini kökündən dəyişə bilər.
Mütəxəssislərin bildirdiyinə görə, fasiləsiz olaraq saatlarla dərs oxumaq beyin üçün əlavə yük yaradır və yaddaşın məlumatı qəbul etmə effektivliyini azaldır. Buna görə də öyrənmə prosesində yeni və daha səmərəli bir üsul – mikro-fasilələr tətbiq olunmalıdır.
Tövsiyə edilir ki, dərs zamanı ardıcıl 1 saat kitab oxumaq əvəzinə, hər 20-25 dəqiqədən bir cəmi 2 dəqiqəlik fasilə verilsin. Bu qısa zaman kəsiyində gözləri yumub dincəlmək və ya tamamilə boşluğa baxmaq beynin öyrənilən məlumatı qısamüddətli yaddaşdan uzunmüddətli yaddaşa daha sürətli ötürməsinə şərait yaradır. Bu sadə, lakin elmi cəhətdən əsaslandırılmış üsul şagirdlərin dərsi daha tez qavramasına və imtahanlarda daha yüksək nəticə əldə etməsinə kömək edəcək.