“Tiktok və İnstaqramda mümkün olan mövcud imkanlardan insanlar fərqli şəkildə yararlanırlar. Əlbəttə, müsbət mənada nə varsa, yayımlamaq, çoxsaylı kütləyə nəyisə təbliğ etmək varsa, olsun. Ama dini mövzuda bir qədər ciddi məsuliyyət var”.
Bu sözləri “Tehsil365”ə açıqlamasında ilahiyyatçı Hacı Təyyar Hüseynli bildirib.
İlahiyyatçı bildirib ki, dini mövzu ilahi bir mövzudur və Tiktok, İnstagram üçün sadə bir mövzu deyil.
“Dini mövzu ilahi bir mövzudur və bu dinin kökü, idealoji əsasları və müqəddəsliyi çoxsaylı mütəxəsislər, bilgili, dərin alimlər, dərin kökənli dini təhsil ocaqları ilə bağlıdır. Bu mövzu sadə bir Tiktok, İnstagram mövzusu deyil. Dini mövzu elə bir mövzu deyil ki, istənilən bir insan bunu məşğuliyyətə çevirsin, dinin təbliği ilə Tiktokda, İnstagramda öz bildiyi tərzdə, fərdi yanaşması ilə təbliğ aparsın, baxış sayı və ya insanlara, çoxsaylı kütlələrə iddialı bir təbliğçi kimi görünsün. Birmənalı şəkildə bundan razı deyiləm”.
Onun sözlərinə görə, təbliğlər dini nöqteyi-nəzərdən insanlar tərəfindən rahatçılıqla təqdim olunur.
“Bilirsiz ki, istənilən kütləvi yayım məkanına - televiziya və radioya xüsusi nəzarət edən qurumlar olur. Tiktok və İnstagramda bu məhdudiyyətlər çox nisbidir. Təbliğlər dini nöqteyi-nəzərdən insanlar tərəfindən rahatçılıqla təqdim olunur. Lakin onun təhsil parametrləri, İslam dini, İslamın böyük alimləri, nüfuzlu təhsil ocaqları və xüsusilə də ilahi bir dinin təbliğində olan məsuliyyət baxımından qəbulolunması məsələsi var. Bu gün Tiktok səhifəsi yaradan bir nəfər insanlara yayım aparır, dindən danışır, bildiyi qədər hər hansı bir müsbət kəlamları çatdıra bilər”.
İlahiyyatçı vurğulayıb ki, İslam dinini təcrübəli insanlar təbliğ edə bilər.
“İslam dininin təbliği ilə bağlı uzunmüddətli təhsilli, təcrübəli və xüsusilə də çoxsaylı müsəlman kütlələrinə obyektiv düşüncəsi və xüsusi istedadı olan insanlar bunu təbliğ etməyə iddialı ola bilər. Adı çəkilən sosial şəbəkələrdə dəyərli, tərbiyəvi əhəmiyyət kəsb edən, milli mənəvi dəyərli, təhsil, elmlə bağlı olan müsbət nə varsa, onun təbliğinə çox müsbət yanaşıram. İnsanın milli-mənəvi dini tərbiyəsinə, uşaqların, yeniyetmələrin, gənclərin ümumi etikasına, mənəvi-maddi düşüncə tərzinə xələl gətirən yanlış təbliğlərin bir ilahiyyatçı və mənəviyyatçı kimi əleyhinəyəm”.