“Təhsil binalarında istifadə olunan tikinti materiallarına nəzarət yalnız tikinti başa çatdıqdan sonra deyil, layihələndirmə, materialların seçilməsi və tikinti-quraşdırma işləri mərhələlərində aparılmalıdır”. Bu sözləri “Tehsil365”*ə açıqlamasında tikinti eksperti Samir Nəbiyev bildirib.
S.Nəbiyevin sözlərinə görə, materialların seçimi və yoxlanılması prosesində normativ standartlara dəqiqliklə riayət olunmalıdır:
“Layihə sənədləri ekoloji, sanitariya-gigiyena və yanğın təhlükəsizliyi tələblərinə uyğun hazırlanmalı, tikintidə isə yalnız uyğunluq sertifikatı və tələb olunan yanğın-texniki göstəriciləri təsdiqlənmiş materiallardan istifadə edilməlidir”.
Ekspert xüsusilə təhsil müəssisələrində istifadə edilən daxili və xarici materialların spesifik göstəricilərinə diqqət çəkib:
“Xüsusilə məktəb və digər təhsil obyektlərində üzlük, izolyasiya, döşəmə, tavan və dekorativ materialların yanıcılıq, alovun yayılması, tüstü əmələgətirmə və toksiklik göstəriciləri, həmçinin insan sağlamlığına zərərli maddələrin ayrılması nəzərə alınmalıdır”.
Son olaraq mütəxəssis tikinti prosesində texniki nəzarətin əhəmiyyətini vurğulayıb:
“Tikinti zamanı texniki nəzarət materialın layihədə nəzərdə tutulan xüsusiyyətlərə və normativ sənədlərə uyğunluğunu da yoxlamalıdır. Yəni təhlükəsizlik sertifikatı sadəcə sənəd deyil — materialın faktiki xüsusiyyətləri də təsdiqlənməlidir”.