Payız-qış mövsümündə məktəb və universitetlərdə siniflərin kifayət qədər havalandırılmaması kəskin respirator virus infeksiyalarının kütləvi yayılmasına səbəb olur.
Tibb üzrə ekspert Rasif Bağırov “Tehsil365*ə açıqlamasında bildirib ki, hazırda məktəblərdə sinif otaqlarının sahəsinə nəzərən şagird sayı həddindən artıq çoxdur:
“Bizdə siniflərdə 30-35 nəfər oturur, bu da böyük sıxlıq yaradır. Payız-qış vaxtı havalar soyuyanda pəncərələr bağlı qalır və nəticədə daxildə kəskin sıxlıq yaranır. Həmin sıxlıqda havalandırmanı nə qədər güclü aparsanız da, xəstəliyin yayılmasının qarşısını almaq çətin olur. Şagirdlərin sayının çoxluğu istər-istəməz içəridəki epidemioloji duruma təsir edir. Hətta havalandırmanı həddindən artıq güclü apardıqda belə, temperatur fərqindən uşaqların səhhəti daha da pisləşə bilər”.
Ekspert əlavə edib ki, sinif otaqlarının sahəsi ilə uşaqların sayı mütləq uyğunlaşdırılmalıdır:
“Hər halda bir sinifdə uşaq sayından həddindən artıq böyük sıxlıq yarandıqda, bir uşaqda xəstəlik baş verərsə, infeksiyanın yayılması çox böyük sürətlə gedir. Çünki sıx kontakt olur və nəticədə epidemioloji vəziyyət pisləşir. Təkcə havalandırma məsələsi ilə epidemioloji vəziyyəti yaxşılaşdırmaq olmaz, uşaqların mütləq sayı normal olmalıdır. Bu, həm təhsilin keyfiyyətinə müsbət təsir göstərər, həm də infeksiyanın qarşısını alar. Yoxsa 35 uşağı bir sinfə doldurub, sonra ventilyasiya sistemi ilə durumu düzəltməyi düşünmək mümkün olan şey deyil”.