Bakı Dövlət Universiteti (BDU), İslam Əməkdaşlıq Təşkilatı Gənclər Forumunun Avrasiya Regional Mərkəzi, “BDU könüllüləri” təşkilatı və “Əmanət” şəhid və qazi övladlarının fərdi inkişafına dəstək layihəsinin təşkilatçılığı ilə BDU-nun Quba Tədris-Təcrübə və İstirahət Mərkəzində tələbələr, şəhid və qazi övladları üçün “Bir yay, min xatirə” adlı yay düşərgəsinin açılışı olub.
“Tehsil365” xəbər verir ki, düşərgə iştirakçıları əvvəlcə Ümummilli Lider Heydər Əliyevin Quba şəhərinin mərkəzində ucaldılmış abidəsini ziyarət ediblər.
BDU-nun Protokol sektorunun əməkdaşı, sessiyanın moderatoru Mirhüseyn Tağıyev “Şəhərsalma və Memarlıq İli” çərçivəsində keçirilən yay düşərgəsinin gənclərə verdiyi töhfələrdən bəhs edib. O bildirib ki, gənclərin mədəni irsin qorunması və gələcək nəsillərə ötürülməsində fəallığının artırılmasını hədəfləyən düşərgə çərçivəsində süni intellekt texnologiyalarının imkanları da təqdim olunacaq.
İslam Əməkdaşlıq Təşkilatı Gənclər Forumu Avrasiya Regional Mərkəzinin baş direktorunun müavini Ramin Həbibzadə çıxışında qeyd edib ki, artıq yay düşərgəsi hər il gənclərin bir araya gəlməsi, yeni bilik və bacarıqlar qazanması, sosial əlaqələrini genişləndirməsi üçün platformaya çevrilib.
“Əmanət” şəhid və qazi övladlarının fərdi inkişafına dəstək layihəsinin rəhbəri Sərxan Bağırov bildirib ki, bu cür yay düşərgələri uşaqların və gənclərin sosial fəaliyyət sahələrində daha fəal iştirakına, yeni dostlar tapmasına, komanda ilə işləmək və kommunikasiya bacarıqlarını inkişaf etdirməsinə mühüm imkan yaradır.
BDU rektorunun katibliyinin referenti, “BDU könüllüləri” təşkilatının baş katibi Qasım Xəlilov çıxışında Bakı Dövlət Universitetinin yay düşərgəsinə ev sahibliyi etməsinin xüsusi əhəmiyyət daşıdığını vurğulayıb. O bildirib ki, BDU-nun gənclər üçün belə mühüm layihələrə ev sahibliyi etməsi universitetin gənclərin inkişafına və onların ictimai fəallığının artırılmasına verdiyi önəmin göstəricisidir. Qasım Xəlilov, həmçinin BDU-nun il ərzində tələbə və gənclərin inkişafına yönəlmiş çoxsaylı təlimlər, interaktiv sessiyalar, simulyasiyalar və müxtəlif layihələr həyata keçirdiyini diqqətə çatdırıb.