Gənclər və tələbələr arasında radikal və ya yanlış dini cərəyanlara meylin azaldılması, bu kimi mənfi halların baş verməməsi üçün maarifləndirmə işlərinin aparılması müstəsna əhəmiyyət kəsb edir.
Bu sözləri “Tehsil365*ə açıqlamasında ilahiyyatçı Tural İrfan bildirib.
O qeyd edib ki, bu proses müəyyən seminarlar və konfranslar şəklində orta məktəblərin yuxarı siniflərindən başlayaraq ali təhsil müəssisələrində də həyata keçirilməlidir:
“Gənclərin inanc məsələsinin düzgün tənzimlənməsi və təməllərinin sağlam olması üçün müvafiq işlər görülməlidir. Bəzən orta məktəblərdə dini fənlərin tədris olunması təklif edilir. Lakin bu, gözlənilən effekti verməyə bilər, çünki mürəkkəb məsələdir. Dinlərin, məzhəblərin tədrisi dünyəvi təhsillə uzlaşmaya bilər. Bütün bunlara baxmayaraq, maarifləndirmə və məlumatlandırma vacibdir. Hesab edirəm ki, ölkə təhsilində bu boşluq hələ də qalmaqdadır və öz mənfi fəsadlarını verir”.
Tural İrfanın sözlərinə görə, bəzən valideynlər hansısa təriqətə mənsub olur və övladlarını da məcburi şəkildə müxtəlif dini ayinlərə qoşurlar, hətta bəzi hallarda onları məktəbdən uzaqlaşdırırlar. Bu kimi halların qarşısını almaq üçün şagird və tələbələrin vaxtında maarifləndirilməsi vacibdir.
İlahiyyatçı vurğulayıb ki, internet və sosial şəbəkələrin geniş yayıldığı bir dövrdə gənclərin zərərli təsirlərə düşməməsi üçün müəyyən tənzimləmələr aparılmalıdır:
“Ölkəmizdə Azərbaycan İlahiyyat İnstitutu, Dini Qurumlarla İş üzrə Dövlət Komitəsi və Mənəvi Dəyərlərin Təbliği Fondu fəaliyyət göstərir. Bu qurumlar sağlam dini mühitin və mənəvi dəyərlərin qorunmasına böyük töhfələr verirlər. Hesab edirəm ki, Təhsil Nazirliyi ilə Dini Qurumlarla İş üzrə Dövlət Komitəsi arasında birgə layihələr həyata keçirilməlidir. Hətta bu istiqamətdə müvafiq konsepsiya və ya qanunvericilik bazasının yaradılmasına zərurət yarana bilər”.
Tural İrfan əlavə edib ki, hər bir vətəndaş öz xalqının, millətinin inancını və tarixini obyektiv şəkildə bilməlidir. Lakin bu sahədə boşluqlar olduğu üçün bəzən gənclər tələbəlik illərindən yanlış cərəyanlara meyllənirlər. Bu da gələcəkdə vətəndaş həmrəyliyini pozur və radikal fikirlərə gətirib çıxarır.
“Bu sahədə maarifləndirmə apararkən obyektiv mütəxəssislərin cəlb olunması vacibdir. Çünki inanc həssas mövzudur. 'Qaş düzəldən yerdə göz çıxarmamaq' üçün balansı qorumaq lazımdır. Çünki bəzən təbliğat aparan şəxslər subyektivliyə yol verərək gəncləri dünyəvilikdən və təhsildən uzaqlaşdıra bilirlər. Düzgün maarifləndirmə isə yalnız radikal meyllərin deyil, həm də gənclər arasında zərərli vərdişlərin qarşısını alacaq, onların sağlam böyüməsinə vəsilə olacaqdır. Azərbaycançılıq ideologiyası, mədəniyyətimiz və tariximiz gənclərə yekdil və sistemli formada təqdim edilməlidir”, – deyə ilahiyyatçı fikrini yekunlaşdırıb.