Azərbaycan Respublikası Nazirlər Kabinetinin 2022-ci il 17 mart tarixli qərarı ilə “Dövlət ümumi təhsil müəssisəsi təhsilalanlarının geyim formalarının təsvirləri” təsdiq edilib. Qərara əsasən, ümumi təhsil müəssisələrində 4 növ geyim formasından biri tətbiq olunur. 2022-ci ildə hər bir ümumi təhsil müəssisəsinin Pedaqoji Şurası tərəfindən məktəbli formasının seçilməsi ilə bağlı müvafiq qərar qəbul edilib. Müəyyənləşdirilmiş vahid geyim forması ən azı 3 tədris ili ərzində dəyişdirilmədən tətbiq olunur.
Məktəbəqədər və Ümumi Təhsil üzrə Dövlət Agentliyindən “Tehsil365”ə bildirilib ki, məktəbli formalarının əldə edilməsi zamanı seçim valideynlərin sərbəst qərarı əsasında həyata keçirilir. Valideynlərin məqsədli şəkildə hər hansı satış məntəqəsinə yönləndirilməsi yolverilməzdir.
Valideynlər məktəbli formaları ilə bağlı ətraflı məlumatı övladlarının təhsil aldığı ümumi təhsil müəssisələrindən, həmçinin yerli təhsili idarəetmə bölmələri ilə əlaqə saxlayaraq əldə edə bilərlər.