“Bəzi məktəblərdə idman dərslərinin keçirilməsi üçün şərait belə yoxdur. Hətta bu hal Abşeron yarımadasında yerləşən məktəblərdə də müşahidə olunur”.
Bu sözləri “Tehsil365”ə açıqlamasında İdman eksperti Kənan Məstəliyev bildirib.
Ekspert bildirib ki, region məktəblərində idman dərsləri üçün şərait yoxdur.
“Bəzilərində idman meydançasının yerində sökülərək bina tikilib, bəzilərində isə başqa bir qurğular var. Regionlarda isə, ümumiyyətlə, idman dərslərinin keçirilməsi üçün demək olar ki, heç bir şərait yoxdur. Və bu ölkədə şagirdlərimizin, yeniyetmə gənc nəslimizin təhsil almaqla yanaşı, həm də yaxşı fiziki hazırlıq əldə etməsinə mane olur. Bizə elə gələ bilər ki, məktəb sadəcə dərs oxumaq üçündür, amma elə deyil. Çünki istənilən şəxsin hər hansı bir işi görmək üçün və dərs oxuması üçün sağlamlığında problem olmamalıdır. Sağlamlıqda problem olduqca fikir ora yönəlir, təhsil almaq fikri isə ikinci plana keçir və öz dərslərinə köklənə bilmir”.
Onun sözlərinə görə, məktəblərdə idman dərslərinə xüsusi diqqət yetirilməlidir.
“İdman dərsləri, fiziki hazırlıq dərsləri şagirdlərimizin daha yaxşı təhsil alması üçün çox vacib bir faktordur. Həmçinin, gələcəkdə, məktəbdən sonrakı dövrlərdə də sağlam bədən olması, sağlam həyat yaşaya bilməsi və sağlam bir vətəndaş olması üçün xüsusi əhəmiyyət daşıyır. Çünki məktəb 11 il çəkən bir prosesdir və bu müddət ərzində hər hansı bir insan bu qədər müddəti idmansız, öz sağlamlığına fikir vermədən keçirsə, sonrakı illərdə bu çox böyük fəsadlara gətirib çıxara bilər. Ona görə də məktəblərdə idman dərslərinə, fiziki hazırlıq dərslərinə xüsusi diqqət yetirilməlidir”.
Ekspert vurğulayıb ki, məktəblərdə idman dərslərinə “barmaqarası” yanaşılır.
“Avadanlıqlar, infrastruktur elə bir səviyyədə olmalıdır ki, hətta şagirdlər məktəbdə keçirilən dərslərə əlavə olaraq orda qalmaq və məşğul olmaq istəsinlər. Bunun təmin edilməsi çox vacibdir. Çünki bu Azərbaycanın gələcəyinin təminin vacib faktorlarından biridir. Məktəblərdə idman dərslərinin keçirilməsi çox vacib bir məsələdir və mən düşünürəm ki, bu məsələyə çox böyük diqqət yetirilməlidir. Hər hansı bir idman infrastrukturunun və avadanlığının çatışmazlığına yol verilməməlidir və idman dərslərinə diqqət yetirilməlidir. Daha bir problem ondan ibarətdir ki, ümumiyyətlə, məktəblərdə idman dərslərinə barmaqarası yanaşılır, onlara sanki əlavə dərs kimi münasibət göstərilir, bəzən keçirilmir. Bu məsələyə diqqət yetirilməli və həllinin vacib olduğu anlaşılmalıdır”.