Çinli alimlər süni intellektdən istifadə etməklə bitkilər üçün sintetik immun reseptorların hazırlanması üzrə dünyada ilk platformanı yaradıblar.
“Tehsil365” azedu.az-a istinadən xəbər verir ki, süni intellekt vasitəsilə yaradılan reseptorlar konkret virusların, bakteriyaların və digər patogenlərin zülallarını tanımaq və bitkinin immun reaksiyasını işə salmaq qabiliyyətinə malikdir.
Alimlərin sözlərinə görə, hazırlanan texnologiya təbii davamlılıq genlərinin axtarışına sərf olunan bir neçə ili bir neçə həftəyə qədər qısalda bilər.
Tədqiqatçılar 14 virusun, iki bakteriyanın, bir göbələyin və bir oomisetin zülallarını tanımaq üçün nəzərdə tutulmuş 391 sintetik reseptor variantı yaradaraq onları sınaqdan keçiriblər. Onların təxminən 18%-i müəyyən edilmiş hədəfi uğurla tanıyıb və nəzərəçarpacaq immun reaksiyaya səbəb olub. Öyrənilən patogenlər arasında kartof və pomidor xəstəliklərinin törədiciləri də olub.
Alimlər həmçinin bir bitkidə bir neçə reseptoru birləşdirmək üsulu hazırlayıblar. Bunun sayəsində bitki eyni vaxtda müxtəlif patogenləri tanıya bilər. Onların fikrincə, bu, xəstəliklərə qarşı daha geniş davamlılığa malik kənd təsərrüfatı bitkilərinin yaradılmasına imkan verəcək.
Bununla belə, bəzi reseptorlar immun aktivlik göstərməyib, digərləri isə autoimmun reaksiyaya səbəb olub. Alimlərin sözlərinə görə, texnologiyanın daha da təkmilləşdirilməsinə ehtiyac var.