“Düşünmürəm ki, buna ehtiyac var. Ona görə ki, əvvəla, yuxarı siniflərdə hərbi hazırlıq dərsləri ilə bağlı, uşaqların, məktəblilərin psixologiyası ilə bağlı yaşına uyğun olaraq onların inkişafı, yəni bu məsələ elmi cəhətdən əsaslandırılmış şəkildə qəbul olunub”.
Bu sözləri “Tehsil365”ə açıqlamasında Hərbi ekspert Şair Ramaldanov bildirib.
Ekspert bildirib ki, hərbi dərslərin daha erkən yaşlardan keçirilməsinə ehtiyac yoxdur.
“Düşünmürəm ki, daha erkən yaşlarda buna ehtiyac var. Digər tərəfdən mən deyərdim ki, buna başqa səbəb də yoxdur. Ona görə ki, indiki zamanda orduda daha çox rəqəmsal texnologiyalar üstünlük təşkil edir və belə olduğu halda bizim məktəblilər də artıq yuxarı siniflərdə rəqəmsal texnologiyalara daha da vərdişli olurlar. Həm məktəbdə keçirilən informatika dərsləri, həm də ki onların gündəlik sosial və digər şəbəkələrdən fəal iştirakçısı olmağı onların bu sahədə biliklərinin artırılmasına səbəb olur”.
Onun sözlərinə görə, gələcəkdə bu istiqamətdə yeni qərarlar qəbul edilə bilər.
“Digər tərəfdən mən deyərdim ki, Azərbaycan ordusu profesional ordular prinsipi ilə inkişaf edir və belə olduğu halda bu gün Azərbaycan ordusunda bütün mütəxəssislər müqavilə əsasında xidmət edirlər. Bu cəhətdən mən deyərdim ki, bəlkə də, gələcəkdə başqa qərarların qəbul edilməsi ola bilər”.
Ekspert vurğulayıb ki, məktəblərdə hərbi dərslərin daha erkən keçirilməsi ilə bağlı qərara ehtiyac yoxdur.
“Həmin qərarlar da heç də məktəblərdə aparılan hərbi dərslərin erkən aparılması ilə bağlı olmayacaq və ona görə də düşünürəm ki, bu məsələyə bu cəhətdən də ehtiyac yoxdur”.