“Görünən bu problem yalnız uşaqlarla bağlı deyil. Ümumiyyətlə, bütün dünyada, o cümlədən, bizim ölkədə də kitaba maraq azalır”.
Bu sözləri “Tehsil365”ə açıqlamasında Yazıçı Elçin Hüseynbəyli bildirib.
Yazıçı bildirib ki, kitaba marağın azalmasının əsas səbəbi sosial şəbəkələrdir.
“Kitaba marağın azalmasının əsas səbəbi sosial şəbəkələr, internet portalları, informasiya bolluğudur. İnsanlar daha çox vizual görüntülərə, oxumalara, hadisələrə üstünlük verirlər. Əlbəttə, naşirlər hər zaman çalışıblar ki, uşaqların marağını cəlb edən kitablar dərc eləsinlər. Əvvəllər rəngli kitablar vardısa, sonradan qabarıq görüntülü kitablar çap olunmağa başladı. Ötən il mən Pekin kitab sərgisində olanda maraqlı bir kitaba rast gəldim. Orada cizgi filmləri kitaba gətirilmişdi. Əvvəllər nağıllar cizgi filminə çevrilirdi, indi cizgi filmləri kitaba gətirilir. Bu da o deməkdir ki, həmin cizgi filminin kadrları, baş verən hadisələr şəkil formasında təqdim olunur”.
Onun sözlərinə görə, süni intellektin inkişafı kitab oxumağa marağın azalmasına səbəb ola bilər.
“Öz mövqeyimdən təəssüf doğuran məqam odur ki, kitaba maraq azalmaqda davam edəcək. Çünki süni intellekt əsridir. Hazırda süni intellekt hər yerə əlini uzadır. Kitab yazır, roman yazır, mahnı bəstələyir, film çəkir, teatr tamaşaları hazırlayır. Və zaman keçdikcə insan resursuna çox da ehtiyac qalmır”.
Ekspert vurğulayıb ki, uşaqların kitaba marağını artırmaq üçün müxtəlif üsullardan istifadə etmək olar.
“Söz əvvəlcə olub və sonda da öləcək. Biz buna inanmalıyıq və inanırıq. İnşALLAH düşünürəm ki, hansısa bir formalar uşaqların kitaba marağını artırmaq üçün tapılacaq. Konkret formanın nə olacağı dəqiq bilinmir. Məsələn, sosial çarxlar vasitəsilə bunu etmək olar”.