Rusiya Elmlər Akademiyasının (REA) Kosmik Tədqiqatlar İnstitutunun Günəş astronomiyası laboratoriyasının proqnozlarına əsasən, növbəti üç gün ərzində geomaqnit vəziyyəti pisləşəcək. Bu prosesin ən yüksək həddinin avqust ayının 28-də baş tutacağı gözlənilir.
“Tehsil365” xarici mediaya istinadən məlumat verir ki, avqustun 26-da Kp indeksi sabit qalsa da, avqustun 27-də maqnit qasırğasının baş vermə ehtimalı 51 faizə, növbəti gün isə 65 faizə qədər artacaq.
Mütəxəssislər xəbərdarlıq edirlər ki, avqustun 28-də orta enliklərdə G1 səviyyəsinə uyğun gələn maqnitosfer dalğalanmaları gözlənilir. Planetar aktivliyi xarakterizə edən Ap indeksinin avqustun 27-də 22 bal, 28-də isə 34 bal olacağı proqnozlaşdırılır. Halbuki sözügedən müddətin başlanğıcında bu rəqəm yalnız 5 vahid səviyyəsində idi.
Növbəti bir ay üçün verilən uzunmüddətli proqnozlara gəldikdə isə, alimlər Günəşdə ciddi dalğalanmaların proqnozlaşdırılmadığını və nisbətən sakit bir vəziyyətin qeydə alındığını bildirirlər.
Bununla belə, alim Natan Eysmont xəbərdarlıq edib ki, Günəşdəki partlayışlar planetimiz üçün ölümcül təhlükə daşımasa da, orbitdəki peyklərə ciddi zərər vura bilər.