İraqdan olan 30 universitet tələbəsi Çinin Qingdao şəhərində yerləşən Çin Neft Universitetində “Pioneers of Excellence” təqaüd proqramı çərçivəsində təhsil alır. Tələbələr hazırda proqramın altı aylıq hazırlıq mərhələsindən keçirlər.
“Tehsil365” xarici mediaya istnadən xəbər verir ki, proqram üzrə tələbələr əvvəlcə çin dili, riyaziyyat, fizika və kimya üzrə hazırlıq keçəcək, daha sonra dördillik bakalavr təhsilinə başlayacaqlar. Təhsil əsasən neft mühəndisliyi, mexanika mühəndisliyi və neft geologiyası istiqamətlərini əhatə edir.
Tələbələr proqram üçün İraqın Neft Nazirliyi və Ali Təhsil və Elmi Tədqiqat Nazirliyinin birgə təşkil etdiyi müsabiqə və müsahibə mərhələləri əsasında seçiliblər. Layihənin əsas məqsədi İraqın enerji sektorunda çalışacaq ixtisaslı mühəndis kadrların hazırlanmasıdır.
Proqram İraqın dövlət təhsil və təlim fondunun dəstəyi, həmçinin PetroChina Iraq – West Qurna 1 şirkətinin maliyyələşdirməsi ilə həyata keçirilir. Təşəbbüsün İraq və Çin arasında təhsil və texniki əməkdaşlığın genişləndirilməsinə də töhfə verməsi gözlənilir.