“Dezinformasiya cəmiyyətin düzgün və obyektiv qərar qəbul etməsinə ciddi maneə yaradan amillərdən biridir.”
Bu sözləri “Tehsil365”ə açıqlamasında Media eksperti Səbuhi Abbasov bildirib.
Ekspert bildirib ki, dezinformasiya ictimai rəyə və insanların qərarvermə prosesinə ciddi təsir göstərə bilər.
“Yanlış və ya qəsdən təhrif edilmiş məlumatlar insanlar arasında yanlış təsəvvür formalaşdırır, ictimai rəyə təsir edir və nəticədə fərdlərin, eləcə də bütövlükdə cəmiyyətin qərarvermə prosesini dəyişdirə bilir. Xüsusilə, sosial şəbəkələrdə məlumatın çox sürətlə yayılması dezinformasiyanın təsir imkanlarını artırır”.
Onun sözlərinə görə, dezinformasiyanın yayılması ictimai etimadı azalda bilər.
“İnsanlar bəzən məlumatın mənbəyini və doğruluğunu yoxlamadan onu paylaşır və nəticədə yanlış informasiya daha geniş auditoriyaya çatır. Dezinformasiya insanların müəyyən hadisələr, şəxslər və qurumlar haqqında yanlış fikir formalaşdırmasına səbəb ola bilər. Bu isə ictimai etimadın azalmasına, sosial gərginliyin artmasına və müxtəlif qruplar arasında qarşıdurmanın yaranmasına gətirib çıxara bilər”.
Ekspert bildirib ki, dezinformasiya insanların seçimlərinə və qərarlarına təsir edə bilər.
“Digər mühüm məqam isə dezinformasiyanın insanların seçimlərinə təsir göstərməsidir. İctimai-siyasi proseslərdə, seçkilərdə, iqtisadi məsələlərdə və sosial problemlərlə bağlı müzakirələrdə yanlış məlumat insanların mövqeyini dəyişdirə və onların real faktlara deyil, yanlış təsəvvürlərə əsaslanaraq qərar verməsinə səbəb ola bilər”.