2026/2027-ci tədris ili üçün ali təhsil müəssisələrinin bakalavriat səviyyəsinə baş tutan qəbulda Azərbaycan Tibb Universitetini (ATU) təkcə bir məktəbdən - Sumqayıt şəhər Təbiət Elmləri Təmayüllü Gimnaziyasının 11 a və 11 C1 siniflərindən ümumilikdə 21 şagird seçib.
“Tehsil365” xəbər verir ki, Gimnaziyanın 11 a sinfi 2025–2026-cı tədris ili üzrə digər qəbul nəticələri ilə də diqqət çəkib. Sinfin 17 məzunu 500-dən yüksək, 13 məzunu isə 600-dən yüksək bal toplayıb. Onlardan 13-ü Azərbaycan Tibb Universitetinin Tibb ixtisasına üstünlük verib. ATU-nu seçənlər arasında sinfin ən yüksək nəticəsini isə Tağızadə Samir Hikmət oğlu göstərib. O, qəbul imtahanında maksimal nəticə olan 700 bal toplayıb.
Yüksək nəticə göstərən məzunlar arasında Mursaquliyeva İnci Rəsul – 690,2, Fərhadova Aysel Elnur – 682,6, Nağıyev Hüseyn Samir – 682, Tahirzadə Amin Pərviz – 679,1 və Səfizadə Rüqiyyəxanım Fərid – 675,4 bal nəticə göstəriblər.
Daha bir maraqlı məqam gimnaziya şagirdlərindən ATU-nun tələbəsi adını qazananlar arasında eyni sinifdə (11 a ) təhsil almış bacı-qardaş da var. Mursaquliyeva İnci 690,2 , Mursaquliyev Həmid isə 667 balla ATU-nun Tibb ixtisası üzrə təhsil alacaqlar.
Beləliklə, bir gimnaziyanın iki sinfindən 21 şagirdin ATU-ya qəbul olması, 11 “A” sinfində 13 məzunun 600-dən yüksək nəticə göstərməsi, həmçinin 700 ballıq nəticə və eyni sinifdən bacı-qardaşın tibb təhsilinə qəbul olunması hər il ali məktəblərə qəbul nəticələrinə görə ön sıralarda olan Sumqayıt təhsilinin bir daha uğurlarının miqyasını nümayiş etdirir.