Bakı Mühəndislik Universitetinin (BMU) Pekin Kimya Texnologiya Universiteti (PKTU) ilə birgə həyata keçirdiyi ikili diplom proqramı çərçivəsində bakalavriat təhsilinin III və IV kurslarını PKTU-da davam etdirəcək 37 tələbədən ibarət ilk qrup Çinə yola salınıb.
BMU-dan “Tehsil365*ə bildirilib ki, tələbələr 2026/2027-ci tədris ilindən etibarən PKTU-da müvafiq ixtisaslar üzrə təhsillərini davam etdirəcəklər. Tələbələrin Çində təhsil alması ikili diplom proqramının növbəti mərhələsi çərçivəsində həyata keçirilir. BMU ilə PKTU arasında ikili diplom proqramının icrasına 2025-ci ildə başlanılıb. Azərbaycan və Çin ali təhsil müəssisələri arasında bakalavriat səviyyəsində həyata keçirilən ilk ikili diplom proqramı 6 ixtisası əhatə edir. Bunlar “Kimya mühəndisliyi”, “Kompüter mühəndisliyi”, “Mexanika mühəndisliyi”, “Kimya”, “Biotexnologiya” və “Biznesin idarə edilməsi” ixtisaslarıdır. “2+2” modeli əsasında həyata keçirilən proqramın şərtlərinə əsasən, tələbələr bakalavriat təhsilinin ilk iki ilini BMU-da başa vurduqdan və müəyyən edilmiş prosedurlardan keçdikdən sonra III və IV kurslarda təhsillərini PKTU-da davam etdirirlər.
Proqram çərçivəsində tələbələr hər iki ali təhsil müəssisəsinin akademik imkanlarından yararlanır, ixtisasları üzrə nəzəri və praktiki hazırlıqlarını davam etdirir, həmçinin beynəlxalq təhsil mühitində təcrübə qazanırlar.
İkili diplom proqramının tələblərini uğurla yerinə yetirən tələbələrə proqramın şərtlərinə uyğun olaraq BMU və PKTU tərəfindən bakalavr diplomlarının verilməsi nəzərdə tutulur.
Qeyd edək ki, BMU-PKTU ikili diplom proqramı Azərbaycan və Çin arasında ali təhsil sahəsində əməkdaşlığın genişləndirilməsinə, tələbələrin beynəlxalq təhsil imkanlarının artırılmasına və yüksəkixtisaslı mütəxəssislərin hazırlanmasına xidmət edir.