Azərbaycan Tibb Universitetinin (ATU) komandası Gənclər və İdman Nazirliyi, Gənclər Fondu və Azərbaycan Tələbə Gənclər Təşkilatları İttifaqının dəstəyi, “Enactus Azərbaycan”ın təşkilatçılığı keçirilən “2026-Enactus Azərbaycan Milli Yarışı”nın final mərhələsində iştirak edir.
“Tehsil365” xəbər verir ki, yarış çərçivəsində ölkənin müxtəlif universitetlərini təmsil edən “Enactus” komandaları sosial və sahibkarlıq yönümlü layihələrini təqdim edərək öz bacarıqlarını nümayiş etdirirlər.
Qeyd edək ki, Milli Yarışın 21 avqust tarixində baş tutan ilk günü - yarımfinal mərhələsi onlayn formatda, 28 avqust tarixində gerçəkləşdirilən final mərhələsi isə fiziki formatda Bakı Konqres Mərkəzində keçirilir.
Universiteti təmsil edən “Enactus ATU” komandası ölkə üzrə 19 ali təhsil müəssisəsinin qatıldığı Milli Yarışın gərgin keçən birinci mərhələsində yüksək nəticə göstərərək, ən güclü 6 universitet sırasına daxil olmaqla final mərhələsinə vəsiqə qazanıb. Bu mərhələ də komandanın prezidenti, Müalicə-Profilaktika II fakültəsinin V kurs tələbəsi Əsmər Astanlı və Biznes və Maliyyə komandasının üzvü, Hərbi Tibb fakültəsinin IV kurs tələbəsi Rəşid Qasımlı nümayəndə heyəti və ölkənin aparıcı iş adamlarından ibarət münsiflər heyəti qarşısında geniş təqdimatla çıxış ediblər. Onlar komandanın hazırladığı innovativ layihəni, onun biznes modelini və sosial təsir imkanlarını yüksək peşəkarlıqla müdafiə ediblər.
Ümumilikdə komandanın digər üzvləri də - Tədqiqat komandasından Zeynəb Binyətova, Zəhra Qafarzadə, İnsan resursları komandasından Aybə Müzəffərzadə, Maliyyə komandasından Xədicə Mikayılzadə, Nəzrin Məmmədova, Rəşid Qasımlı fəallıq nümayiş etdiriblər.