Son zamanlar Dövlət Təhlükəsizliyi Xidmətinin (DTX) və digər hüquq-mühafizə orqanlarının adını hallandırmaqla, müxtəlif dövlət və digər qurumların, o cümlədən səhiyyə sahəsində çalışan rəhbər şəxslərin adından, hətta onların açıq internet resurslarından əldə edilmiş telefon nömrələrindən istifadə edilməklə müxtəlif kiberdələduzluq hallarının törədilməsi faktları qeydə alınır.
“Tehsil365” xəbər verir ki, xüsusən rəhbər şəxslərin adından çıxış edən kiberdələduzlar hədəf aldıqları şəxslərdə etibar yaradır, daha sonra isə onları müxtəlif qanunsuz və maliyyə xarakterli əməllərə sövq etməyə çalışırlar.
Daha geniş yayılan dələduzluq üsullarından biri qarşı tərəfə guya DTX tərəfindən barəsində araşdırma aparılacağı, istintaqa cəlb ediləcəyi, verilən “tapşırıqlar” yerinə yetirilmədiyi təqdirdə DTX-nin təzyiqi ilə üzləşəcəyi barədə yalan məlumatların verilməsidir. Həmçinin şəxsdən müxtəlif bank hesablarının təqdim edilməsi, hesabından müəyyən məbləğdə vəsaitin çıxarılması və ya köçürülməsi yolu ilə vəziyyətin “düzəldiləcəyinə” dair saxta vədlər verilir.
Azərbaycan Tibb Universiteti bütün əməkdaşlarını belə hallara qarşı diqqətli və sayıq olmağa, bu cür zəng və mesajlara inanmamağa çağırır.
Belə bir halla qarşılaşdığınız təqdirdə:
zəng edən şəxsin tələblərini yerinə yetirməyin;
şübhəli zəng və mesajlara cavab verməyin;
rəhbər şəxsin adından müraciət edildiyi halda, məlumatı yalnız həmin şəxslə üzbəüz görüşərək dəqiqləşdirin;
şübhəli hallarla bağlı aidiyyəti şəxsləri dərhal məlumatlandırın.
Diqqət! Bank kartlarının rekvizitləri, parollar, istifadəçi məlumatları, habelə birdəfəlik təsdiq kodları (OTP) heç bir halda kənar şəxslərlə paylaşılmamalıdır.
Unutmayın: rəhbər şəxsin adı, vəzifəsi və ya DTX-nin adının çəkilməsi edilən zəngin həqiqiliyinə zəmanət vermir. Şübhəli hallarda ən doğru addım məlumatı yalnız və yalnız müstəqil və canlı şəkildə yoxlamaqdır.