Bakı Slavyan Universitetinin Qərbi Slavyan filologiyası kafedrasının əməkdaşı İlkana Mahmudlu “Polşanı kəşf et” adlı beynəlxalq yay məktəbində iştirak edib.
“Tehsil365” xəbər verir ki, 24 iyul – 6 avqust tarixlərində keçirilən beynəlxalq yay məktəbi Polşa Milli Akademik Mübadilə Agentliyinin (NAWA) maliyyə dəstəyi, Rjeşuv Universitetinin Filologiya fakültəsi və Polyak Mərkəzinin təşkilatçılığı ilə həyata keçirilib.
Proqram çərçivəsində iştirakçılar polyak dili üzrə biliklərini təkmilləşdirib, Polşanın tarixi, mədəniyyəti və ictimai həyatı ilə yaxından tanış olmaq, həmçinin beynəlxalq akademik mühitdə təcrübə mübadiləsi aparmaq imkanı əldə ediblər.
İki həftə davam edən proqram müddətində İlkana Mahmudlu intensiv polyak dili dərslərində, Polşanın tarixi və mədəniyyətinə həsr olunmuş seminar və mühazirələrdə, eləcə də dil mübadiləsi məşğələlərində iştirak edib. Proqramın akademik və praktiki hissələri onun polyak dili üzrə bilik və bacarıqlarının inkişafına mühüm töhfə verib.
Yay məktəbi çərçivəsində iştirakçılar müxtəlif tarixi-mədəni məkanlara təşkil olunan ekskursiyalarda iştirak ediblər. Səfərlər zamanı Polşanın zəngin tarixi-mədəni irsi, yerli ənənələri və mədəniyyəti ilə yaxından tanış olublar.
Yay məktəbinin sonunda İlkana Mahmuduya proqramı uğurla tamamladığını təsdiq edən rəsmi sertifikat təqdim olunub.