Kimya və Kimya mühəndisliyi departamenti Xəzər Universitetinin 35 illiyinə həsr olunmuş “Kimya Müəllimliyi üzrə İntensiv Yay Məktəbi”ni təşkil edir.
“Tehsil365” xəbər verir ki, Yay məktəbi Xəzər Universiteti, Bakı Ali Neft Məktəbi, Bakı Dövlət Universiteti və Bakı Mühəndislik Universiteti də daxil olmaqla müxtəlif ali təhsil müəssisələrinin tələbələrini bir araya gətirir və onlara intensiv praktiki və laboratoriya məşğələləri vasitəsilə nəzəri biliklərini möhkəmləndirmək imkanı yaradır.
Proqram kimyanın dörd əsas istiqamətini - Analitik kimya, Üzvi kimya, Qeyri-üzvi kimya və Neft kimyasını əhatə edir. Təlimlər zamanı praktiki tədrisə xüsusi diqqət yetirilir ki, bu da tələbələrə laboratoriya prosedurları, kimyəvi analiz, sintez, eksperimental üsullar və universitet
kurslarında öyrəndikləri nəzəri biliklərin praktik tətbiqi üzrə təcrübə qazanmağa imkan verir. Beləliklə də laboratoriya məşğələləri və praktiki fəaliyyətlər vasitəsilə iştirakçılar kimyanın müxtəlif sahələrində istifadə olunan eksperimental üsullarla yaxından tanış olur, təcrübələrin aparılması, laboratoriya avadanlıqlarından istifadə, eksperimental nəticələrin təhlili, eləcə də laboratoriya şəraitində təhlükəsiz və səmərəli işləmək üzrə zəruri bacarıqlarını inkişaf etdirirlər.
Xəzər Universitetinin 35 illiyinə həsr olunmuş tədbirlər çərçivəsində təşkil edilən Yay məktəbi Universitetin gənc mütəxəssislər arasında kimya təhsilinin, elmi düşüncənin və praktiki laboratoriya bacarıqlarının inkişafına davamlı töhfəsini əks etdirir.