Azərbaycan Universitetində 2026/2027-ci tədris ili üzrə qəbul planı universitet tarixində ilk dəfə tam yerinə yetirilib. Hazırda qeydiyyat prosesi davam edir. Abituriyentlər tələbə adının rəsmiləşdirilməsi üçün sentyabrın 8-dək “myGov” platforması vasitəsilə qeydiyyatdan keçməlidirlər.
Universitetdən “Tehsil365”ə bildirilib ki, qəbul planının tam yerinə yetirilməsi universitetə olan marağın və etimadın artdığını göstərən mühüm göstəricidir.
İxtisas seçimi baxımından isə son illərdə müəyyən istiqamətlər üzrə marağın dəyişdiyini müşahidə edirik. Xüsusilə I qrup ixtisaslarına maraq yüksəkdir. Azərbaycan Universitetində bu istiqamətdə informasiya təhlükəsizliyi, informasiya texnologiyaları və kompüter mühəndisliyi ixtisasları tədris olunur və bu ixtisaslara maraq son illərdə davamlı xarakter daşıyır. Bu tendensiya əmək bazarında rəqəmsallaşma və texnoloji transformasiya ilə də səsləşir. Müasir təşkilatlarda informasiya texnologiyalarından istifadənin genişlənməsi bu sahələr üzrə mütəxəssislərə ehtiyacı artırır. Biznes və iqtisadiyyatyönümlü ixtisaslara maraq isə daha çox sabit xarakter daşıyır. Bu sahələr uzun illərdir abituriyentlərin seçimində ön sıralarda olan klassik istiqamətlərdəndir və həmin ixtisaslara marağın davam etdiyini görürük. Eyni zamanda, əvvəlki illərdə nisbətən kölgədə qalan beynəlxalq ticarət və logistika ixtisasına marağın son dövrdə artması diqqət çəkir. Bu dəyişikliklər Azərbaycanın regional və beynəlxalq ticarətdə rolunun genişlənməsi, logistika və təchizat zəncirlərinin əhəmiyyətinin artması ilə əlaqələndirilə bilər.
Bununla yanaşı, son illərdə sosial iş və dövlət və ictimai münasibətlər ixtisaslarına maraq artır. Bu istiqamətlərə artan maraq sosial xidmətlərə, ictimai idarəetməyə, kommunikasiya və dövlət-vətəndaş münasibətlərinin müxtəlif sahələrində peşəkar kadrlara olan ehtiyacın dəyişməsi ilə səsləşir. Ümumilikdə qəbul göstəriciləri və ixtisas seçimlərindəki dəyişikliklər abituriyentlərin həm əmək bazarında perspektivli hesab olunan yeni istiqamətlərə, həm də ənənəvi olaraq tələbat olan ixtisaslara marağını qoruduğunu göstərir. İnformasiya texnologiyaları və informasiya təhlükəsizliyi kimi sahələrdə davamlı yüksək maraq, biznes və iqtisadiyyat ixtisaslarına sabit seçim, eləcə də beynəlxalq ticarət, logistika, sosial iş və dövlət-ictimai münasibətlər istiqamətlərində artan maraq əmək bazarındakı dəyişikliklərin abituriyentlərin seçimlərinə təsir etdiyini göstərən əsas tendensiyalardır.