Bakı Dövlət Universitetinin (BDU) beynəlxalq reytinqlərdəki dinamikasının əsas amillərdən biri təhsilin keyfiyyətinin yüksəldilməsi və proqramların beynəlxalq standartlara uyğunlaşdırılmasıdır. Bu istiqamətdə keyfiyyət təminatı mexanizmlərinin təkmilləşdirilməsi və magistratura ixtisaslaşmalarının beynəlxalq proqram akkreditasiyasından keçirilməsi xüsusi yer tutur.
“Tehsil365” xəbər verir ki, 2026-cı ildə BDU-nun molekulyar biologiya, mikrobiologiya, biofizika, ekoloji kimya, bərk cisim elektronikası, radiasiya materialşünaslığı, geokimya, beynəlxalq hüquq, nanomateriallar kimyası, riyazi modelləşdirmə, riyazi analiz, diskret sistemlər, konfliktologiya və klinik psixologiya ixtisaslaşmaları beynəlxalq proqram akkreditasiyasından keçmişdir. Bununla BDU-nun magistratura səviyyəsində beynəlxalq proqram akkreditasiyasından keçmiş ixtisaslaşmalarının ümumi sayı 20-yə çatıb.
Qeyd olunub ki, beynəlxalq akkreditasiya prosesi BDU-da keyfiyyət təminatı mədəniyyətinin institusionallaşdırılmasına, proqramların müasir tələblərə uyğunlaşdırılmasına və məzunların qlobal əmək bazarında rəqabət qabiliyyətinin artırılmasına xidmət edir. Keyfiyyət təminatı ilə beynəlmiləlləşmə siyasətinin paralel aparılması isə Universitetin qlobal akademik məkana inteqrasiyasını daha sistemli xarakterə gətirir.
Son illərdə Türkiyə, Özbəkistan, Qazaxıstan, Pakistan, Çin, Qırğızıstan, Yaponiya, Cənubi Koreya, İsrail, Avropa ölkələri və digər istiqamətlər üzrə əlaqələr həm coğrafi, həm də məzmun baxımından genişlənib. Xüsusilə Mərkəzi Asiya ölkələri ilə əməkdaşlığın intensivləşməsi BDU-nun türk dünyasının və regionun akademik məkanı ilə əlaqələrinə strateji xarakter vermişdir.
Beynəlmiləlləşmənin mühüm istiqamətlərindən biri ikili diplom və birgə təhsil proqramlarının inkişafıdır. Hazırda BDU-da 12 aktiv ikili diplom proqramı fəaliyyət göstərir. Bu proqramlar Anhui Universiteti, Pekin Kimya Texnologiyaları Universiteti, Yerusəlim İbrani Universiteti, L.N. Qumilyov adına Avrasiya Milli Universiteti, Ş. Yessenov adına Xəzər Dövlət Texnologiyaları və Mühəndislik Universiteti, Holon Texnologiya İnstitutu, Satbayev Universiteti və Əl-Fərabi adına Qazax Milli Universiteti ilə əməkdaşlıq əsasında həyata keçirilir. Eyni zamanda, Türkiyə, Qırğızıstan, Çin, Özbəkistan, İsrail və digər ölkələrin ali məktəbləri ilə yeni ikili diplom proqramlarının yaradılması istiqamətində danışıqlar aparılır.
Beynəlxalq əməkdaşlığın institusional bazasını Konfutsi İnstitutu, Abay Kunanbayev adına Qazax Mərkəzi, Azərbaycan-Koreya Kompüter Elmləri Mərkəzi, Hüquq fakültəsində İnsan hüquqları və informasiya hüququ üzrə UNESCO kafedrası, Biologiya fakültəsində Biotibbi materiallar üzrə ICESCO kafedrası, həmçinin MAGnUS layihəsinin dəstəyi ilə yaradılmış Rəqəmsal araşdırmalar laboratoriyası kimi strukturlar və təşəbbüslər gücləndirir.
BDU, eyni zamanda, Avrasiya Universitetlər Assosiasiyası, Qara Dəniz Universitetlər Şəbəkəsi (BSUN), Avropa Paytaxtları Universitetləri Şəbəkəsi (UNICA), İslam Dünyası Universitetləri Federasiyası (FUIW), Beynəlxalq Astronavtika Federasiyası (IAF), Avropa Hüquq Fakültələri Assosiasiyası (ELFA), Qlobal Universitetlər Şəbəkəsi (GUNI) və digər beynəlxalq qurumlarla əməkdaşlıq edir. Son dövrdə Beynəlxalq Təhsilverənlər üçün İqlim Fəaliyyəti Şəbəkəsinə (CANIE) və Beynəlxalq Dayanıqlı Kampus Şəbəkəsinə (ISCN) üzvlük Universitetin qlobal təhsil gündəliyində iştirak imkanlarını daha da genişləndirib.