Azərbaycan Dövlət Pedaqoji Universiteti (ADPU) 2026/2027-ci tədris ili üzrə ali təhsil müəssisələrinin qəbul planına əsasən, pedaqoji ixtisaslar üzrə ölkənin 20 ali təhsil müəssisəsində ümumilikdə 8580 plan yeri müəyyənləşdirilib. Həmin plan yerlərinin 3075-i Azərbaycan Dövlət Pedaqoji Universitetinin və onun beş filialının payına düşür. ADPU və onun filialları ölkə üzrə pedaqoji ixtisaslar üzrə ümumi qəbul planının təxminən 36 faizini təşkil edir.
ADPU-dan “Tehsil365”ə bildirilib ki, pedaqoji istiqamətlər üzrə ölkədə hər 100 qəbul yerindən 36-sı Pedaqoji Universitetin və onun filiallarının payına düşür. Bu göstərici universitetin Azərbaycanda müəllim və digər pedaqoji kadrların hazırlanmasında aparıcı mövqeyini əks etdirir.
ADPU və universitetin Şəki, Quba, Şamaxı, Ağcabədi və Cəlilabad filialları üzrə 2026/2027-ci tədris ili üçün bütün ixtisaslar üzrə ümumilikdə 3 605 plan yeri müəyyənləşdirilib. Onlardan 3 075-i pedaqoji, 530-u isə qeyri-pedaqoji ixtisaslar üzrədir.
Qeyri-pedaqoji ixtisaslar üzrə plan yerlərinin 230-u ADPU-nun, 300-ü isə universitetin filiallarının payına düşür. Beləliklə, qeyri-pedaqoji ixtisaslar ADPU şəbəkəsi üzrə ümumi qəbul planının 14,7 faizini, pedaqoji ixtisaslar isə 85,3 faizini təşkil edir.
Qeyri-pedaqoji istiqamətlər üzrə qəbul imkanlarının genişləndirilməsi ADPU-nun 2030-cu ilədək qəbul planının 30 faizinin sahəyə yaxın qeyri-pedaqoji ixtisaslar hesabına şaxələndirilməsi strategiyasının tərkib hissəsidir. Bu yanaşma universitetin əsas missiyası olan müəllim və pedaqoji kadr hazırlığını qorumaqla yanaşı, ixtisas portfelinin əmək bazarının dəyişən tələblərinə uyğun genişləndirilməsini nəzərdə tutur.
Xüsusilə universitetin filiallarında qeyri-pedaqoji ixtisaslar üzrə 300 plan yerinin müəyyənləşdirilməsi regionlarda kadr hazırlığının müxtəlif istiqamətlər üzrə genişləndirilməsi, yerli əmək bazarının ehtiyaclarının nəzərə alınması və filialların fəaliyyət istiqamətlərinin mərhələli şəkildə şaxələndirilməsi baxımından mühüm əhəmiyyət daşıyır.