Azərbaycan Rəssamlıq Akademiyası ilə Qırğızıstanın ali təhsil və incəsənət müəssisələri arasında elmi, akademik və yaradıcılıq əlaqələri mövcuddur. Əməkdaşlıq müəllim və tələbələrin beynəlxalq yaradıcılıq layihələrində iştirakını, təcrübə mübadiləsini və incəsənət təhsili sahəsində əlaqələri əhatə edir.
Bu barədə “Tehsil365”ə Akademiyadan məlumat verilib.
Azərbaycan Rəssamlıq Akademiyasının təşəbbüsü ilə yaradılmış Rektorlar Şurası türk dövlətlərinin incəsənət və rəssamlıq istiqaməti üzrə ali təhsil müəssisələrinin rəhbərlərini bir araya gətirir. Şuranın üzvləri sırasında Qırğız Respublikasının Turqunbay Sadıkov adına Milli İncəsənət Akademiyası da təmsil olunur. Rektorlar Şurası çərçivəsində Azərbaycan Rəssamlıq Akademiyası ilə Turqunbay Sadıkov adına Milli İncəsənət Akademiyası arasında anlaşma memorandumu imzalanıb. Memorandumda tədris və elmi-tədqiqat sahəsində əməkdaşlıq, birgə tədqiqat layihələrinin həyata keçirilməsi, müəllim və tələbə mübadiləsi, həmçinin əməkdaşların mübadiləsi nəzərdə tutulub.
Rəssamlıq Akademiyasının Memarlıq və dizayn fakültəsinin Bədii toxuculuq və xalça sənəti kafedrasının dosenti Sona Nağıyeva Bişkek şəhərində “Mədəni irs və xalqlar birliyi” mövzusunda beynəlxalq elmi-praktik konfransda iştirak edib. O, Azərbaycan xalqının mədəni irsi, o cümlədən xalçaçılıq sənətinin tarixi kökləri, bədii xüsusiyyətləri və müasir inkişaf istiqamətləri ilə bağlı təqdimat edib.
Qırğızıstanın İssık-Kul vilayətində keçirilən “Şərqin Günəş Palitrası” beynəlxalq yaradıcılıq plenerinə Azərbaycan Rəssamlıq Akademiyası hər il qoşulur. Sonuncu plenerdə Akademik kompozisiya və rəngkarlıq kafedrasının müəllimi Fəxri Abbasov və rəngkarlıq ixtisasının III kurs tələbələri Ülkər Şıxova və Aydan Məmmədli iştirak ediblər. Onlar müxtəlif ölkələrdən olan iştirakçılarla birgə yaradıcılıq prosesində iştirak edib, İssık-Kulun təbiətini və Qırğızıstanın milli-mədəni irsini əks etdirən əsərlər yaradıblar.