Sentyabrın 4-5-də İsmayıllı rayonunun Basqal qəsəbəsi və Sulut kəndində Tarixi Yerlər və Abidələr VI Beynəlxalq Sulut Simpoziumu təşkil ediləcək. Simpozium görkəmli arxeoloq, tarix elmləri namizədi Fazil Osmanovun anadan olmasının 90 illiyinə həsr ediləcək.
Bu barədə “Tehsil365”ə AMEA Arxeologiya və Antropologiya İnstitutundan məlumat verilib.
Tədbirdə Azərbaycan və Türkiyədən alim və mütəxəssislərin məruzələri dinləniləcək. Simpoziumun açılışında AMEA-nın prezidenti akademik İsa Həbibbəyli, Arxeologiya və Antropologiya İnstitutunun direktoru dosent Fərhad Quliyev, Təşkilat Komitəsinin sədri Fariz Xəlilli, Mersin Arxeologiya Muzeyindən Funda Yüksel Özer və Fazil Osmanovun ailəsi adından Lətif Osmanovun çıxışları nəzərdə tutulub.
Elmi məruzələr Fazil Osmanovun elmi irsi və Qafqaz Albaniyasının arxeologiyası; arxeoloji tədqiqatlar, tarixi yerlər və mədəni landşaft; tarixi-memarlıq, dini və epiqrafik irs; muzeylər, mədəni turizm, yerli icmalar və mədəni irsin davamlı inkişafı istiqamətlərini əhatə edəcək.
Sentyabrın 5-də iştirakçılar Sulut məscidi, buzxana, Mustafa xanın Hərəm qalası, Kələzeyvə türbələri və Xan qalası ilə tanış olacaqlar. Proqram çərçivəsində Fazil Osmanovun evinin ziyarəti də nəzərdə tutulub. Simpozium onlayn elmi proqramı da təşkil olunacaq.