Azərbaycan ilə Qırğızıstan arasında mədəni və elmi əməkdaşlığın mühüm istiqamətlərindən birini musiqi və xoreoqrafiya sənəti sahəsində həyata keçirilən birgə layihələr təşkil edir.
Bakı Xoreoqrafiya Akademiyasından “Tehsil365*ə bildirilib ki, Azərbaycan-Qırğızıstan xoreoqrafiya əlaqələrinin inkişafında 2026-cı il xüsusi əhəmiyyət daşıyır. Bu çərçivədə Bakı Xoreoqrafiya Akademiyası ilə Ç.Bazarbayev adına Bişkek Xoreoqrafiya Texnikumu arasında əməkdaşlıq haqqında müqavilə imzalanıb. Müqavilə iki təhsil müəssisəsi arasında əlaqələrin institusional əsasda inkişaf etdirilməsini, təhsil və yaradıcılıq təcrübəsinin qarşılıqlı bölüşdürülməsini, elmi-metodik əməkdaşlığın genişləndirilməsini və birgə layihələrin həyata keçirilməsini nəzərdə tutur. Sənədin imzalanması Azərbaycan və Qırğızıstanın xoreoqrafiya təhsili və sənəti sahəsində mövcud əlaqələrinin daha da inkişaf etdirilməsi baxımından mühüm addımdır. Əməkdaşlıq çərçivəsində qarşılıqlı təcrübə mübadiləsinin aparılması, təhsil və yaradıcılıq layihələrinin təşkili, elmi-metodik istiqamətdə birgə fəaliyyətlərin həyata keçirilməsi və milli xoreoqrafiya irsinin öyrənilməsi üçün yeni imkanların yaradılması nəzərdə tutulur.
Azərbaycan və Qırğızıstan arasında tarixən mövcud olan dostluq və qardaşlıq münasibətləri fonunda xoreoqrafiya və musiqi sənəti sahəsində həyata keçirilən bu cür əməkdaşlıq layihələri iki ölkənin zəngin mədəni irsinin beynəlxalq səviyyədə tanıdılmasına, qarşılıqlı mədəni əlaqələrin inkişafına və milli sənət nümunələrinin gələcək nəsillərə ötürülməsinə töhfə verir.