Bakı Dövlət Universiteti (BDU) ilə Qırğızıstan universitetləri arasında əlaqələr bu il yeni mərhələyə yüksəlib.
Universitetdən “Tehsil365*ə bildirilib ki, Qırğızıstanın bir sıra ali təhsil müəssisələri ilə müxtəlif formatlarda əməkdaşlıq əlaqələri mövcuddur. Bu sıraya Qırğızıstan-Türkiyə Universiteti, Qırğız Milli Universiteti, Qırğızıstan Beynəlxalq Universiteti, Qırğız İqtisad Universiteti və Bişkek Dövlət Universiteti daxildir. Universitetlərarası əməkdaşlıq anlaşma memorandumları, əməkdaşlıq müqaviləsi və “Orhun” mübadilə protokolu əsasında həyata keçirilir.
Tələbə mübadiləsi də BDU ilə Qırğızıstan universitetləri arasında əməkdaşlığın mühüm istiqamətlərindən biridir. Hazırda BDU-da Qırğızıstandan olan 2 tələbə təhsil alır. 2025–2026-cı tədris ilində Qırğızıstandan 1 tələbə “Orhun” mübadilə proqramı çərçivəsində BDU-da təhsil alıb. 2026–2027-ci tədris ilində isə Qırğızıstan-Türkiyə Manas Universitetinin 3 tələbəsinin “Orhun” mübadilə proqramı çərçivəsində BDU-da təhsil alması nəzərdə tutulur.
Xatırladaq ki, bu ilin fevralında Yusif Balasaqunlu adına Qırğız Milli Universitetinin rektoru Dogdurbek Çontoyevin rəhbərlik etdiyi nümayəndə heyəti BDU-da olub. Görüş zamanı təhsil, elm və tədqiqat sahələrində əməkdaşlığın genişləndirilməsi məsələləri müzakirə edilib. Səfər çərçivəsində Qırğız Milli Universitetinin rektoru BDU tələbələri qarşısında mühazirə ilə çıxış edib.
May ayında isə BDU ilə M.M. Adışev adına Oş Texnologiya Universiteti arasında anlaşma memorandumu imzalanıb. Memorandumda təlim-tədris prosesinin təkmilləşdirilməsi və beynəlxalq standartlara uyğunlaşdırılması məqsədilə birgə layihələrin, konfrans, sərgi, seminar və simpoziumların, qısamüddətli kurs və təlimlərin keçirilməsi, həmçinin ortaq elmi-tədqiqatların aparılması nəzərdə tutulur.