Azərbaycan Memarlıq və İnşaat Universiteti (AzMİU) Qırğızıstanın ali təhsil müəssisələri ilə mövcud elmi və akademik əlaqələrin daha da genişləndirilməsində maraqlıdır.
Universitetdən “Tehsil365*ə bildirilib ki, xüsusilə Qırğızıstan-Türkiyə Manas Universiteti ilə əməkdaşlığın dərinləşdirilməsi, akademik mobilliyin artırılması və birgə elmi-tədqiqat layihələrinin həyata keçirilməsi prioritet istiqamətlərdəndir.
Qırğızıstan-Türkiyə Manas Universiteti ilə AzMİU arasında sıx akademik münasibətlər formalaşıb. Qarşılıqlı əlaqələr çərçivəsində elmi və akademik təcrübə mübadiləsinə, universitet nümayəndələrinin qarşılıqlı səfərlərinə, birgə təşəbbüslərin və əməkdaşlığın yeni istiqamətlərinin müəyyənləşdirilməsinə önəm verilir. Qırğızıstanla əməkdaşlıqda akademik mobillik xüsusi yer tutur. Müxtəlif dövrlərdə “Mövlanə” mübadilə proqramı, habelə Türk Universitetlər Birliyinin “Orhun” mübadilə proqramı çərçivəsində tələbə və akademik heyətin qarşılıqlı mübadiləsi, təcrübə və bilik paylaşımı üçün imkanlar yaranıb. Bu proqramlar universitetlər arasında əlaqələrin yalnız institusional səviyyədə deyil, tələbə və müəllimlərin birbaşa iştirakı ilə inkişaf etməsinə, ortaq akademik mühitin formalaşmasına xidmət edir.
AzMİU Türk Dövlətləri Təşkilatına üzv olan qardaş ölkələrin, o cümlədən Qırğızıstanın universitetləri ilə elmi əməkdaşlığın da genişləndirilməsində maraqlıdır. Universitetin profilinə uyğun olaraq memarlıq, inşaat mühəndisliyi, şəhərsalma, seysmik dayanıqlılıq, ekologiya, dayanıqlı inkişaf, rəqəmsal texnologiyalar və digər mühəndislik istiqamətləri birgə fəaliyyət üçün perspektivli sahələr hesab olunur. Qarşıdakı dövrdə ortaq elmi-tədqiqatların aparılması, birgə məqalələrin hazırlanması, alimlərin konfrans və simpoziumlarda qarşılıqlı iştirakı, seminar və yay məktəblərinin təşkili, həmçinin beynəlxalq qrant layihələrinə birgə müraciət imkanlarının genişləndirilməsi mümkündür.