Azərbaycan Texniki Universitetinin (AzTU) rektoru Vilayət Vəliyevin rəhbərlik etdiyi nümayəndə heyəti Almaniya Federativ Respublikasına səfəri çərçivəsində Aaxen Texniki Universitetində (RWTH Aachen University) bir sıra görüşlər keçirib.
“Tehsil365” xəbər verir ki, Nümayəndə heyətində tədris məsələləri üzrə prorektor Sübhan Namazov, Metallurgiya və materiallar texnologiyası kafedrasının müdiri Səyami Hüseynov və kafedranın tədqiqatçı professoru, Almaniyanın “IXUN GmbH” şirkətinin direktoru Xüdaverdi Kərimov təmsil olunub.
Səfər çərçivəsində nümayəndə heyəti Aaxen Texniki Universitetinin Tekstil Texnologiyaları İnstitutunda (ITA) həyata keçirilən müasir tədris, tədqiqat və innovasiya fəaliyyətləri, yeni nəsil öyrənmə imkanları, eləcə də sənaye ilə əməkdaşlığın müasir modelləri ilə yaxından tanış olub.
Görüş zamanı AzTU-nun rektoru Vilayət Vəliyev universitetdə tədris, tədqiqat və innovasiya sahələrində həyata keçirilən fəaliyyətlər, aparılan islahatlar və Aaxen Texniki Universiteti ilə əməkdaşlığın mövcud potensialı barədə geniş təqdimatla çıxış edib. O qeyd edib ki, AzTU Aaxen Texniki Universiteti ilə tədris, elmi-tədqiqat, innovasiya, akademik mobillik və sənaye əməkdaşlığı istiqamətlərində uzunmüddətli və nəticəyönümlü əlaqələrin qurulmasında maraqlıdır.
Aaxen Texniki Universitetinin Tekstil Texnologiyaları İnstitutunun (ITA) direktoru professor Thomas Gries institutun, “ITA Academy”nin və tərəfdaşlarının AzTU ilə əməkdaşlıqda maraqlı olduğunu bildirib. O, xüsusilə qabaqcıl materiallar, tekstil texnologiyaları və sənaye yönümlü tədqiqatlar sahəsində birgə tədris və elmi-tədqiqat fəaliyyətlərinin həyata keçirilməsi üçün geniş imkanların olduğunu qeyd edib.
Görüş çərçivəsində AzTU ilə “RWTH Aachen International Academy gGmbH” arasında Sənaye idarəetməsi və rəqəmsal transformasiya (Industrial Management and Digital Transformation) adlı 6 modullu Mini MBA proqramının birgə həyata keçirilməsi barədə razılıq əldə olunub. Proqramın müasir sənaye idarəçiliyi, rəqəmsal transformasiya və mühəndislik menecmenti istiqamətlərində mütəxəssislərin peşəkar inkişafına töhfə verməsi nəzərdə tutulur.
Daha sonra “APS GmbH” Avropa Mexatronika Mərkəzinin rəhbəri Dr. Andreas Bündgens Süni İntellekt və Robototexnika Mərkəzi “Center for Artificial Intelligence and Robotics (CAIRE)” haqqında təqdimatla çıxış edib. O, süni intellekt, robototexnika və mexatronika sahələrində AzTU ilə birgə tədqiqat və innovasiya layihələrinin həyata keçirilməsində maraqlı olduqlarını bildirib.
Görüşlərin yekununda AzTU ilə Aaxen Texniki Universitetinin Tekstil Texnologiyaları İnstitutu (ITA) arasında əməkdaşlıq müqaviləsi imzalanıb. Müqavilə çərçivəsində tədris, elmi-tədqiqat, innovasiya, mütəxəssis hazırlığı və sənaye ilə əməkdaşlıq istiqamətlərində birgə fəaliyyətlərin həyata keçirilməsi nəzərdə tutulur.
Səfər çərçivəsində AzTU nümayəndə heyəti, həmçinin Aaxen Texniki Universitetinin Mexanika mühəndisliyi fakültəsini ziyarət edib. Fakültənin dekanı professor Wolfgang Schröder ilə keçirilən görüşdə AzTU ilə Aaxen Texniki Universiteti arasında mövcud əməkdaşlığın daha da inkişaf etdirilməsi üçün perspektiv istiqamətlər müzakirə olunub.
Görüş zamanı rektor Vilayət Vəliyev AzTU-nun inkişaf strategiyası, müasir mühəndislik təhsilinin təşkili, elmi-tədqiqat və innovasiya potensialının gücləndirilməsi istiqamətində həyata keçirilən layihələr barədə təqdimatla çıxış edib.
Tərəflər nəqliyyat və logistika, mexatronika və materiallar mühəndisliyi sahələrində əməkdaşlıq imkanlarını müzakirə edib, birgə tədris proqramlarının, elmi-tədqiqat layihələrinin, akademik mobillik proqramlarının və sənaye yönümlü innovasiya layihələrinin həyata keçirilməsi üçün mövcud potensialı nəzərdən keçiriblər.
Səfərin nəticələri göstərir ki, AzTU ilə Aaxen Texniki Universiteti arasında əməkdaşlığın yalnız ənənəvi akademik əlaqələrlə məhdudlaşmayaraq, birgə mühəndis hazırlığı, tətbiqi elmi-tədqiqat, rəqəmsal transformasiya, süni intellekt, robototexnika, qabaqcıl materiallar və sənaye ilə birgə innovasiya istiqamətlərində yeni mərhələyə keçirilməsi üçün geniş imkanlar mövcuddur.