Azərbaycan Dillər Universiteti 2026–2027-ci tədris ili üzrə tələbə qəbulunda yüksək nəticə əldə edib. Universitet üzrə müəyyən edilmiş qəbul planı 100 faiz dolub.
“Tehsil365” xəbər verir ki, Dövlət İmtahan Mərkəzinin (DİM) 2026–2027-ci tədris ili üzrə ali təhsil müəssisələrinə tələbə qəbulu ilə bağlı açıqladığı statistik məlumatlara əsasən, Azərbaycan Dillər Universiteti qəbul planının tam yerinə yetirildiyi ali təhsil müəssisələri sırasında yer alıb. Beləliklə, ADU-da növbəti tədris ili üçün nəzərdə tutulan plan yerlərinin hamısı üzrə qəbul həyata keçirilib.
Qeyd edək ki, 2026–2027-ci tədris ili üzrə I mərhələdən sonra tələbə qəbulu aparılan ali təhsil müəssisəsindən yalnız 14-də qəbul planı 100 faiz dolub. Azərbaycan Dillər Universitetinin də bu ali təhsil müəssisələri sırasında yer alması universitetə göstərilən yüksək marağın və ADU-nun abituriyentlər tərəfindən üstünlük verilən ali təhsil müəssisələrindən biri olaraq mövqeyini qoruduğunun göstəricisidir.
ADU-da qəbul planının tam dolması universitetin təhsil proqramlarının rəqabətqabiliyyətliliyini, müasir əmək bazarının tələblərinə uyğun kadr hazırlığı istiqamətində həyata keçirilən məqsədyönlü fəaliyyətini və akademik mühitə olan etimadı əks etdirən mühüm göstəricilərdən biridir.
Universitetdə tədrisin keyfiyyətinin yüksəldilməsi, təhsil proqramlarının davamlı təkmilləşdirilməsi, tələbəyönümlü yanaşmanın gücləndirilməsi, beynəlxalq əməkdaşlığın genişləndirilməsi və müasir təhsil çağırışlarına uyğun innovativ yanaşmaların tətbiqi istiqamətində sistemli fəaliyyət davam etdirilir. 2027–2031-ci illəri əhatə edəcək Strateji İnkişaf Planının hazırlanması da universitetin uzunmüddətli inkişaf prioritetlərinin müasir tələblər əsasında müəyyənləşdirilməsinə yönəlib.