Səfərin ilk günündə nümayəndə heyəti Pekinin tarixi və mədəni məkanlarını, o cümlədən Çin səddini, Sənət muzeyini və “İtirilmiş şəhərin divarları”nı ziyarət edib.
“Tehsil365” xəbər verir ki, Pekin proqramının ardından nümayəndə heyəti Çenqdu şəhərinə yola düşüb. Səfərin növbəti mərhələsində Çenqdu Tibb Universitetində Naxçıvan Dövlət Universitetinin nümayəndə heyətinin rəsmi qarşılanma mərasimi və görüş keçirilib. Görüşdə Çenqdu Tibb Universitetinin Tibb fakültəsinin dekanı, Beynəlxalq Əlaqələr Mərkəzinin direktoru və digər rəsmi şəxslər iştirak ediblər. Qarşılıqlı görüş zamanı hər iki universitetin Tibb fakültəsinin fəaliyyəti, təhsil imkanları və əsas istiqamətləri barədə ətraflı məlumat verilib. Ardınca tərəflər arasında qarşılıqlı xatirə hədiyyələri təqdim olunub, tələbə və müəllimlərin iştirakı ilə xatirə fotosu çəkdirilib.
Səfərin davamında NDU nümayəndə heyəti Çenqdu Tibb Universitetinin muzeyi, kitabxanası və Alternativ Təbabət Mərkəzi ilə tanış olub. Xüsusilə Alternativ Təbabət Mərkəzinə səfər tələbələr üçün praktik və maarifləndirici baxımdan maraqlı olub. Burada qədim Çin təbabətinin müxtəlif müalicə üsulları – akupunktur, manual terapiya və masaj, eləcə də herbal terapiya, yəni dərman bitkilərindən istifadə əsasında müalicə metodları haqqında məlumat verilib. Tələbələr qədim Çin təbabətinin tətbiq xüsusiyyətləri ilə yaxından tanış olub, mütəxəssislərin iştirakı ilə keçirilən müayinələri izləyib və prosesdə iştirak etmək imkanı əldə ediblər.
Çinə səfər Naxçıvan Dövlət Universitetinin Tibb fakültəsinin tələbə və müəllimlərinin beynəlxalq təcrübə mübadiləsində iştirak etməsi, müxtəlif tibbi yanaşmalarla tanış olması və beynəlxalq əlaqələrin daha da genişləndirilməsi baxımından mühüm əhəmiyyət daşıyır.