Azərbaycan startaplarının beynəlxalq investorlar, mentorlar, korporativ tərəfdaşlar və qlobal innovasiya şəbəkələri ilə əlaqələrinin genişləndirilməsi istiqamətində yeni imkanlar yaradılır.
“Tehsil365” AZERTAC-a istinadən xəbər verir ki, bunu İnnovasiya və Rəqəmsal İnkişaf Agentliyinin (İRİA) İdarə Heyətinin sədri Fərid Osmanov sentyabrın 2-də Bakıda keçirilən “Plug and Play × IDDA – Industry Challenge” innovasiya vörkşopu zamanı çıxışında deyib.
F.Osmanov bildirib ki, İRİA və “Plug and Play” tərəfindən həyata keçirilən GOAL proqramı çərçivəsində altı Azərbaycan startapı Silikon vadisində keçiriləcək proqrama seçilib. Startaplar burada beynəlxalq vençur fondları, mentorlar, korporativ tərəfdaşlar və innovasiya şəbəkələri ilə əlaqələr qurmaq imkanı əldə edəcəklər.
O qeyd edib ki, İRİA-nın “Microsoft for Startups Investor Network” proqramında iştirakı da yerli startapların texnoloji imkanlarının genişləndirilməsinə xidmət edir: “İndiyədək 18 startapa proqramdan yararlanmaq üçün xüsusi yönləndirmə kodları təqdim olunub. Uyğun startaplar “Azure” bulud kreditləri, süni intellekt infrastrukturu və xidmətləri, “GitHub Enterprise”, “LinkedIn”, “Visual Studio Enterprise”, texniki dəstək və “Microsoft” mühəndisləri ilə məsləhətləşmələrdən yararlana bilirlər”.