Azərbaycan Milli Elmlər Akademiyasının (AMEA) Məhəmməd Füzuli adına Əlyazmalar İnstitutunun Qırğız Respublikası ilə elmi-mədəni əlaqələri ortaq türk mədəni irsinin, klassik və müasir ədəbiyyat nümunələrinin, əlyazma və yazılı abidələrin tədqiqi, qorunması və təbliği istiqamətində inkişaf etdirilir.
“Tehsil365” AZERTAC-a istinadən xəbər verir ki, iki ölkənin elmi müəssisələri, alim və tədqiqatçıları arasında əməkdaşlıq beynəlxalq elmi tədbirlər, birgə tədqiqat və nəşr layihələri, eləcə də türk xalqlarının ədəbi-mədəni irsinə həsr olunan elmi platformalar vasitəsilə həyata keçirilir. Çingiz Aytmatov irsinin öyrənilməsi, “Manas” və “Alpamış” kimi ortaq türk epik nümunələrinin tədqiqi, həmçinin Azərbaycan klassik ədəbiyyatının Qırğızıstanın elmi-mədəni mühitində tanıdılması əməkdaşlığın əsas istiqamətlərindəndir. İnstitutun Qırğızıstanla elmi əlaqələrinin nümunələrindən biri Bişkekdə keçirilən “Rəqəmsal əsrdə kitab və mütaliə” mövzusunda beynəlxalq konfrans olub. Tədbirin plenar iclasının açılışında Azərbaycanı Əlyazmalar İnstitutunun direktoru akademik Teymur Kərimli təmsil edib.
Əməkdaşlığın digər mühüm istiqamətini tarix və şərqşünaslıq sahəsində tədqiqatlar təşkil edir. Bu baxımdan Qırğızıstan Tarixi Cəmiyyətinin fəxri professoru, şərqşünas alim, tarixçi, akademik Börü Əhmədovun 100 illik yubileyinə həsr olunmuş beynəlxalq konfrans xüsusi əhəmiyyət daşıyır. Azərbaycan, Türkiyə, Rusiya, Qırğızıstan və digər ölkələrdən alim və mütəxəssislərin iştirak etdiyi konfransda Əlyazmalar İnstitutunun əməkdaşı “Əmir Teymurun babası Sədr əş-Şəriənin “Viqayə” əsərinin Bakı nüsxəsi” mövzusunda məruzə ilə onlayn çıxış edib. Məruzəçi tədbirdə iştirakına görə təşkilatçı qurumların sertifikatına layiq görülüb. İnstitutdan bildirilib ki, bu istiqamətdə əməkdaşlıq Azərbaycan və Qırğızıstanın ortaq tarixi-mədəni yaddaşının, eləcə də türk xalqlarının yazılı və şifahi irsinin elmi əsaslarla araşdırılmasına və qarşılıqlı şəkildə təbliğinə mühüm töhfə verir.